एजेन्सी - नेपाली राष्ट्रिय क्रिकेट टोलीका पूर्व मुख्य प्रशिक्षक उमेश पटवालले नेपाली खेलाडीहरूमा प्रतिभा भए पनि उच्च दबाबका खेलहरू जिताउन सक्ने 'म्याच विनर'को अझै अभाव रहेको बताएका छन्। 'Times of India' सँगको विशेष कुराकानीमा पटवालले नेपालले ठुला टोलीहरूलाई कडा टक्कर दिए पनि नतिजा आफ्नो पक्षमा पार्न अन्तिम समयमा चुक्ने गरेको टिप्पणी गरे।

पटवालका अनुसार क्रिकेटमा बलियो उपस्थिति जनाउन केवल राम्रो खेल्नु मात्र पर्याप्त हुँदैन, खेल जित्नु अनिवार्य हुन्छ। "मलाई सधैँ लाग्छ कि आफ्नो प्रभाव छोड्न खेल जित्नै पर्छ," उनले भने, "मानिसहरूले केवल च्याम्पियनहरूलाई पछ्याउँछन्। नेपालले पछिल्ला खेलहरू सुखद अन्त्य त गर्‍यो, तर जितको अन्तिम रेखा पार गर्न अझै बाँकी छ।"

प्रतिभा छ, तर भूमिकामा अन्योल
नेपालले २०२४ को विश्वकपमा दक्षिण अफ्रिकालाई स्तब्ध पार्ने अवस्थामा पुर्‍याएको र हालै इङ्गल्याण्डलाई समेत कडा चुनौती दिएको सन्दर्भमा पटवालले हराएको कडी (Missing Element) बारे चर्चा गरे। उनका अनुसार समस्या प्रतिभाको होइन, बरु कठिन समयमा कसले जिम्मेवारी लिने भन्ने स्पष्टताको हो।

"उनीहरूमा को 'म्याच विनर' हो भन्ने निश्चित छैन। सन्दीप लामिछाने मुख्य बलर हुन् भन्ने विश्वास जस्तै ब्याटिङमा पनि कसले खेल सकाउने भन्ने स्पष्ट हुनुपर्छ।" - उमेश पटवाल

कुशल, दीपेन्द्र र रोहितमाथि भरोसा
पटवालले नेपालका स्टार खेलाडीहरू कुशल भुर्तेल, दीपेन्द्र सिंह ऐरी र कप्तान रोहित पौडेलले खेल समाप्त गर्ने (Finish) क्षमता विकास गर्नुपर्नेमा जोड दिए। "यदि यी खेलाडीहरूले खेल जिताएर फर्कन सुरु गरे भने ठुला टोली र नेपालबिचको खाडल कम हुनेछ। अहिलेको मुख्य समस्या भनेकै उच्च स्तरका खेलमा पर्याप्त म्याच-विनरहरू नहुनु हो," उनले थपे।