२०८१ माघ २४, बिहिबार
२०८१ माघ २४, बिहिबार
काठमाडौं - यसपालिको होली तथा फागु पूर्णिमा नेपाली कलाकारहरुले आआफ्नै तरिकाले मनाएका छन् । कसैले परिवारसँग मिलेर मनाए भने कसैले राजधानीका विभिन्न क्षेत्रमा विभिन्न कार्यक्रम आयोजना गरी सर्वसाधारणसँग होली मनाएका छन् ।
अभिनेता राजेश हमालले कपुरधारास्थित निवासमा आइपुगेका फिल्मकर्मीसँग रङ साटासाट गर्दै होली मनाए ।
फिल्म ‘छक्कापञ्जा ४’को टीमले यो वर्ष बानेश्वर चोकमा ‘छक्कापञ्जा ४ होली विशेष कार्यक्रम’ आयोजना गरी सर्वसाधारणसँग मिलेर होली मनाएको छ ।
कार्यक्रममा कलाकारहरु निर्मल शर्मा, दीपाश्री निरौला, बेनिशा हमाल, केदार घिमिरे, राज आचार्यलगायतका कलाकारहरु उपस्थित थिए ।दीपकराज गिरी भने रेडियोले आयोजना गरेको होली कार्यक्रममा प्रस्तुत भए ।
अभिनेत्रीद्वय रेखा थापा र श्वेता खड्काले भने यो वर्ष सँगै मिलेर होली मनाए ।
यसपालिको होली अभिनेता पल शाहको लागि भने केही विशेष भयो । यौन दुर्व्यवहारको मुद्दामा जेल सजाय काटिरहेका शाहले सफाइ पाएर थुनामुक्त भएपछि यो उनको पहिलो होली हो ।
उनले काठमाडौंस्थित आफ्नै निवासमा सपरिवार होली मनाए । पलसँग होली मनाउन उनी निकट फिल्मकर्मी र संगीतकर्मी उनकै निवास पुगेका थिए ।
अभिनेत्री स्वस्तिमा खड्काले श्रीमान् निश्चल बस्नेत र अभिनेता आर्यन सिग्देलले आफ्नो परिवारसँग होली मनाए ।
त्यसैगरी अभिनेत्री नीता ढुङ्गानाले श्रीमान हरिहर अधिकारीसँग भारतमा होली मनाइन् । यतिबेला नीता आफ्नै ब्यानरमा निर्माण हुने चलचित्र ‘ह्रस्व दीर्घ’को छायांकनका लागि भारत पुगेकी छन् ।
अभिनेत्री सञ्चिता लुइँटेलले आफ्ना छोराछोरीसित होली खेल्दै गरेको तस्बिर सार्वजनिक गरेकी छन् । तस्बिरमा अभिनेता निखिल उप्रेती भने देखिएका छैनन् ।
कलाकारहरु वर्षा सिवाकोटी, पूजा शर्मा, झरना थापा, एलिजा गौतमलगायतका कलाकारहरुले पनि परिवार र साथीहरुसँग होली मनाएका छन् ।
