२०८१ मङ्सिर २७, बिहिबार
२०८१ मङ्सिर २७, बिहिबार
मान्छे बिनै चिया बेच्ने मेसिन
नेपालकै पहिलो नेपाली भाषा बोल्ने मार्स ‘गो गो’ रोर्बट र कोरोनाको समयमा आइसोलेसन वार्डमा प्रयोगमा ल्याउन सकिने नर्स रोबोट ‘गो कोरोना रोबोट’ बनाएका बुटवलका जुम्ल्याहा दाजुभाइ लभ र कुश पन्थीले सफ्टवेयरमार्फत मान्छे बिनै चिया बिक्री गर्न सक्ने मेसिन (टी–स्क्यान) बनाएका छन् ।
गुल्मी जिल्ला मालिका गाउँपालिका वडा न. ७ घर भई हाल बुटवल बस्दै आएका १८ वर्षका उनीहरुले ६ महिना लगाएर बनाएको सफ्टवेयरले क्यूआर कोड स्क्यान मार्फत चिया बेच्ने मान्छेको भौतिक उपस्थिति बिना नै चिया बेच्न सक्ने प्रविधि विकास गरेका हुन् ।
यो प्रविधिमा चिया राख्ने मेसिनको माथिलो भागमा क्यूआर कोड राखिएको छ, जसमा ग्राहकले आफ्नो ई–सेवा वालेट तथा मोबाइल बैकिङ एपको सहायताले कोडलाई स्क्यान गरेर रकम तिरेपछि मेसिनको चिया कपमा झर्छ ।
चियाको मूल्य बराबरको रकम खातामा गएपछि मात्र चिया झर्ने र कप भरिएपछि स्वतः रुपमा बन्द हने लब पन्थीले बताए । एक पटक पकाएको चिया ६ देखि ७ घन्टा सम्म एउटै तापक्रममा रहने उनीहरुले जानकारी गराएका छन् ।
क्यूआर कोड स्क्यान गरेर चिया बिक्री गर्न मिल्ने सफ्टवेयर नेपालमा मात्र नभई विश्वमै पहिलो भएको लभ–कुशले बताएका छन् । यसबाट चिया मात्र नभई जुस दूध लगायत तरल पदार्थ बेच्न सकिन्छ ।
काठमाडौंको विभिन्न स्थानहरुमा थरमसमा चिया बेच्ने गरीएकाले त्यसमा सहजता ल्याउन उक्त मेसिनको निमार्ण गरिएको उनीहरुले बताएका छन् । यस मेसिनबाट रोजगारी सिर्जना समेत हुने उनीहरुको विश्वास रहेको छ ।
‘क्यूआर कोड पेमेन्ट सिष्टम’मा ई–सेवाले सहकार्य गरेको छ । यो सफ्टवेयरको व्यवसायिक प्रयोग भएको खण्डमा अस्पताल लगायत सार्वजनिक स्थानमा चिया पसल वा थर्मसमा बोकेर चिया बेच्ने झन्झट नहुने लब पन्थीले बताए । सफ्टवेयर सहित ५ लिटरको उक्त मेसिनको २९ हजार ९ सय ९९ रुपैयाँ मुल्य राखिएको उनीहरुले बताएका छन् ।
विज्ञान विषयमा कक्षा १२ उतीर्ण गरेका उनीहरुले निमार्ण गरेको ‘गो कोरोना’ रोबोटलाई उनीहरुले प्रदेशको तत्कालीन सामाजिक विकास मन्त्रालयलाई हस्तान्तरण गरेका थिए । रोबोटमार्फत नेपालको कृषि, शिक्षा र स्वास्थ्य क्षेत्रमा योगदान गर्ने आफूहरुको उद्देश्य रहेको तर सरकारी निकायबाट आर्थिक सहयोग प्राप्त उनीहरुको गुनासो छ ।
