२०८१ मङ्सिर २७, बिहिबार
२०८१ मङ्सिर २७, बिहिबार
काठमाडौँ- पछिल्ला केही दिनदेखि नेपालमा कोरोना भाइरसको सङ्क्रमण बढ्दै गएको छ । असार १ गते गरिएको परीक्षणमा ०.६४ प्रतिशतमा कोरोना पुष्टि भएको थियो । असार २९ गते पुग्दासम्म यो दर बढेर ६.४८ पुगेको छ ।
बुधबार र बिहीबार २ सयभन्दा बढीमा संक्रमण पुष्टि भएको छ । पछिल्ला दिनमा बढेको सङ्क्रमणको अवस्थालाई कोरोनाको चौथो लहरको रूपमा हेरिएको छ । इपिडिमियोलोजी तथा रोग नियन्त्रण महाशाखाका निर्देशक डा. चुमनलाल दासले अहिलेको संक्रमण स्थितिले चौथो लहरको सङ्केत गरेको बताए ।
बिहीबार थप २६० जनामा संक्रमण पुष्टि भएपछि सक्रिय सङ्क्रमितको संख्या १ हजार १७१ पुगेको छ । सिमानाकाबाट प्रवेश गर्ने यात्रुमा परीक्षण गर्दा अधिकांश यात्रुमा कोरोना पुष्टि भएको छ । अहिले देखिएको सङ्क्रमणमा करिब ३५ प्रतिशत सङ्क्रमित सीमामा भेटिएका छन् ।
निर्देशक डा. दासका अनुसार दुई सातादेखि संक्रमण बढेको छ । जसमा बुधबार र बिहीबारको तथ्याङ्क अनुसार दुई सय बढीमा संक्रमण देखिएको छ । उनले अस्पताल भर्ना हुने क्रम पनि बढेको जानकारी दिए । केही बिरामी आइसियुमा उपचाररत छन् ।
अस्पताल र प्रयोगशाला तयारी अवस्थामा
नेपालमा अहिले देखिएको संक्रमण ओमिक्रोन बिए फाइभको भएको पाइएको छ । यो भेरिअन्ट अन्य भेरियन्टभन्दा छिटो फैलिने हुँदा जोखिम पनि बढी रहेको चिकित्सकहरूले बताएका छन् । यसको खतरा कति रहन्छ भन्ने अहिले अध्ययनकै क्रममा रहेकोले यसै भन्न नसकिने निर्देशक डा. दासले बताए ।
अहिले देखिएको सङ्क्रमणमा ३५ प्रतिशत केस नाकामै देखिएको छ । सीमामा सङ्क्रमित धेरै भेटिन थालेपछि नाकामा कडाइ गरिएको छ । २० वर्षदेखि ४५ वर्षसम्मको उमेर समूहमा संक्रमण बढी देखिएको छ । जसमा काठमाडौंमा सङ्क्रमित बढी छन् । सङ्क्रमणको जोखिम बालबालिका, गर्भवती र दीर्घरोगीहरु छन् ।
कोरोना महामारीका बेला स्वास्थ्य क्षेत्रमा धेरै संयन्त्रहरू विकास भएका र संक्रमण बढ्दै जाँदा ती संयन्त्रलाई फेरि सक्रिय बनाइएको उनले बताए । उनका अनुसार अस्पतालहरूलाई तयारी अवस्थामा रहन भनिएको छ । ‘बिरामी भर्ना गर्ने देखि लिएर अक्सिजन र औषधि दुरुस्त अवस्थामा राख्न भनिएको छ । परीक्षणका लागि प्रयोगशालाहरूलाई पनि तयारी अवस्थामा राख्न भनिएको छ,’ उनले भने, ‘बिरामीहरूको स्क्रिनिङ गरिरहेका छौँ ।’
पछिल्लो समय जनस्वास्थ्यका मापदण्डहरू पालनामा लापरबाही भएको छ । ‘कडाइका साथ स्वास्थ्य मापदण्ड पालनाका लागि आग्रह गरेका छौँ । अतिरिक्त खोप लगाउनका लागि आग्रह गरेका छौँ,’ निर्देशक दासले भने, ‘परीक्षण गर्न आग्रह गरेका छौँ । शङ्का लाग्नेमा तत्काल परीक्षण गर्नु पर्छ । आफू जोगिन र अरूलाई जोगाउन परीक्षण महत्त्वपूर्ण छ ।’
