विराटनगर - नेपाली राष्ट्रिय क्रिकेट टोलीका सदस्य ललितनारायण राजवंशीले कोशी प्रदेश सरकारले 'जनता आवास कार्यक्रम' अन्तर्गत आफ्नो परिवारका लागि बनाइदिने घोषणा गरेको घर नलिने बताएका छन्। आफू आर्थिक रूपमा घर बनाउन सक्षम रहेको भन्दै उनले सो घर आफूभन्दा विपन्न र आवश्यक परिवारलाई बनाइदिन आग्रह गरेका हुन्।

बिहीबार विराटनगरमा पत्रकारहरूसँग कुरा गर्दै उनले भने, ‘मेरो परिवारलाई राख्ने घर बनाउन म आफैँ सक्षम छु। सरकारको यो कार्यक्रम जुन समुदायका लागि हो, उनीहरूले नै पाउनुपर्छ। जसका लागि बजेट आएको हो, उसैलाई घर बनाइदेओस्।’

ललितले सरकारले सहानुभूतिस्वरूप केही सहयोग गर्न चाहेमा त्यो स्वीकार्य हुने तर जनता आवासजस्तो गरिब लक्षित कार्यक्रमको सुविधा आफूले लिनु उचित नहुने स्पष्ट पारे।

गत साउन २५ गते ललितकी ६३ वर्षीया आमा शुभकुमारीको हृदयघातका कारण निधन भएको थियो। उनको निधनपछि श्रद्धाञ्जली दिन ललितको घर पुगेका नेपाली कांग्रेसका प्रदेशसभा सदस्य अमृत अर्यालले ‘जनता आवास कार्यक्रम’ अन्तर्गत घर बनाइदिने घोषणा गरेका थिए। सोही घोषणाप्रति ललितले आफ्नो धारणा सार्वजनिक गरेका हुन्।