२०८१ पुस ३, बुधबार
२०८१ पुस ३, बुधबार
.jpg)
काठमाडौं - सुदूरपश्चिम रोयल्स जनकपुर बोल्ट्सलाई ८ विकेटले पराजित गर्दै नेपाल प्रिमियर लिग (एनपीएल) को फाइनलमा प्रवेश गरेको छ ।
सुदूरपश्चिमले अब उपाधिका लागि शनिबार जनकपुर बोल्ट्स र कर्णाली याक्सबीचको विजेतासँग प्रतिस्पर्धा गर्नेछ । सुदूरपश्चिमसँग पराजित जनकपुरले भने अब फाइनल प्रवेशका लागि बिहीबार दोस्रो क्वालिफायरमा कर्णाली याक्ससँग प्रतिस्पर्धा गर्नेछ ।
यसअघि बुधबार बिहान भएको इलिमिनेटरमा चितवन राइनोजविरुद्ध २१ रनको जित निकाल्दै कर्णालीले दोस्रो क्वालिफायरमा स्थान बनाएको थियो । प्रतियोगिताको दोस्रो क्वालिफायर बिहीबार दिउँसो १२ः१५ बजेदेखि सुरु हुनेछ ।
कीर्तिपुरस्थित त्रिवि क्रिकेट मैदानमा सम्पन्न खेलमा जनकपुरले प्रस्तुत गरेको १४० रनको लक्ष्य सुदूरपश्चिमले १८.३ ओभरमा आठ विकेट गुमाएर पूरा गर्यो । सुदूरपश्चिमको जितमा ओपनर विनोद भण्डारीले ५८ रन बनाए । उनले ५५ बलमा तीन चौका र तीन छक्का प्रहार गरे । एनपीएलमा विनोदको यो पहिलो अर्धशतक हो ।
विनोदले पहिलो विकेटका निम्ति अर्का ओपनर सबै जैबसँग ७.३ ओभरमा ५६ रनको साझेदारी गर्दै सुदूरपश्चिमलाई उत्कृष्ट सुरुआत दिलाएका थिए । किशोर महतोको ओभरमा जिम्मी निसमबाट क्याच हुनुअघि जैबले ३२ रन बनाए । उनले २१ बलमा तीन चौका र दुई छक्का प्रहार गरे ।
५६–१ को स्थितीबाट विनोदले दोस्रो विकेटका निम्ति ब्रान्डन म्याकमुलमसँग ५९ रनको साझेदारी गर्दै सुदूरपश्चिमलाई सहज जिततर्फ डोहोर्याएका थिए । १५औँ ओभरको पहिलो बलमा ललित राजवंशीले निसमबाटै क्याच गराउनुअघि म्याकमुलमले २५ रन जोडे । उनले १९ बलमा एक चौका र एक छक्का प्रहार गरे ।
विनोदसँगै अविजित रहेका कप्तान दीपेन्द्रसिंह ऐरीले २० रन बनाए । जनकपुरका ललित राजवंशी र किशोर महतोले समान १-१ विकेट लिए ।
त्यसअघि टस जितेर ब्याटिङमा आएको जनकपुरले निर्धारित २० ओभरमा नौ विकेट गुमाएर १३९ रनको योगफल खडा गरेको थियो । जिम्मी निसमले सर्वाधिक ४५ रन बनाए । अर्धशतकबाट पाँच रनले चुकेका निसमले २३ बलमा तीन चौका र तीन छक्का प्रहार गरे । निसमलाई १९औँ ओभरको चौथो बलमा स्कट कुग्गेलेनले बोल्ड गरे ।
सुभ कंशाकारले २४ बलमा चार चौकासहित २६ रन जोडे । सुभलाई नवौँ ओभरको अन्तिम बलमा दीपेन्द्रसिंह ऐरीले रनआउट गरेका थिए । ओपरन लहिरु मिलान्थाले १२ रन थप्दा कप्तान आसिफ सेख र अर्निको यादवले समान ११ रन बनाए । नियमित कप्तान अनिल साह हातमा लागेको चोटका कारण खेल नसक्ने हुँदा आसिफले कप्तानीको जिम्मेवारी पाएका हुन् ।
शेर मल्लले दुई तीन बलमा तीन रन थपे । आकाश त्रिपाठी चार रनमा अविजित रहँदा किशोर महतोले दुई रन जोडे ।
सुदूरपश्चिमका कप्तान दीपेन्द्रसिंह ऐरीले तीन विकेट लिए । सैब जैबले दुई र स्कट कुग्गेलेनले एक विकेट लिए । दीपेन्द्रले जनकपुरका ओपनर लहिरु मिलान्था, अर्निको यादव र मोहसिन मोहमदको विकेट लिए । जैबले आसिफ सेख र हर्ष थाकेरको विकेट लिए । स्कट कुग्गेलेन र अभिनाश बोहराले समान १-१ विकेट लिए । कुग्गेलेन जनकपुरका जिम्मी निसमलाई पभेलियनको दिशा देखाएका थिए । अभिनाशले शेर मल्लाई ब्रान्डन म्याकमुलमबाट क्याच गराएका थिए ।
यी दुई टिमबीच लिग चरणमा भएको खेलमा पनि सुदूरपश्चिमले जनकपुरलाई हराएको थियो । दीपेन्द्रसिंह ऐरीको कप्तानीमा रहेको सुदूरपश्चिमले जनकपुरविरुद्ध ७२ रनको सहज जित निकालेको थियो । लिग चरणमा शीर्ष स्थान हासिल गरेको सुदूरपश्चिमले सात खेलबाट १२ अंक जोेडेको थियो । समान खेलबाट १० अंक जोडेको जनकपुर दोस्रो स्थानमा रहँदै प्लेअफमा आइपुगेको हो ।
