२०८१ माघ २४, बिहिबार
२०८१ माघ २४, बिहिबार
काठमाडौं - नेपाल क्रिकेट संघ (क्यान) र कारबाहीमा परेका खेलाडीबीच वार्ता समाधान्मुख भएको छ ।
क्यानका कार्यवाहक सचिव प्रशान्त बिक्रम मल्लले कारबाहीमा परेका खेलाडीसँग सहमति बनेको जानकारी गराए ।
क्यानका अध्यक्ष चतुर बहादुर चन्द, कार्यवाहक सचिव प्रशान्त बिक्रम मल्ल, कोषाध्यक्ष रोशन सिंह, मुख्य प्रशिक्षक पुबुदु दसानायाके र ज्ञानेन्द्र मल्लबीचको छलफल सहमतिमा पुगेको हो ।
क्यानले कारबाहीमा परेका चार खेलाडीलाई केन्द्रिय सम्झौता (सेन्ट्रल कन्ट्रयाक्ट) को ग्रेडिङमा समावेश गराउने भएपछि सहमति बनेको हो ।
क्यान र खेलाडीबीच सहमति बनेसँगै राष्ट्रिय क्रिकेट टिमको बन्द प्रशिक्षण सोमबारबाट सुरु हुने भएको छ ।
टियु क्रिकेट मैदानमा बिहान ९ बजेबाट बन्द प्रशिक्षण सुरु हुनेछ ।
'हामीले हाम्रो लागि भन्दा पनि राष्ट्रका लागि खेल्न अनुरोध गरेका थियौं । सहमति भन्दा पनि उहाँहरुको निवेदनमाथि आगामी बैठकमा छलफल गर्ने र ग्रेडिङमा समावेश गर्ने हामीले भनेका छौँ,' मल्लले खेलपाटीसँग भने, 'अब भोलिबाट टिमको प्रशिक्षण सुरु हुनेछ ।'
आईसीसी पुरुष टि-ट्वान्टी विश्वकपको ग्लोबल छनोटका लागि क्रिकेट टिमले आइतबारबाट प्रशिक्षण सुरु गर्ने तयारी गरेको थियो । खेलाडीलाई शनिबारसम्म होटलमा रिपोर्टिङ गर्न अनुरोध गरेको थियो ।
क्यानले बन्द प्रशिक्षणका लागि ३० खेलाडी छनोट गरेको थियो।
तर, कारबाहीमा परेका चार खेलाडीसहित एक दर्जन बढी खेलाडीले होटलमा रिपोर्टिङ गरेका थिएनन् ।
कारबाहीमा परेका पूर्व कप्तान ज्ञानेन्द्र मल्ल, उपकप्तान दीपेन्द्र सिंह ऐरी, सोमपाल कामी र कमल सिंह ऐरी सहित १४ खेलाडीले रिपोर्टिङ गरेका थिएनन् ।
क्यानले गत महिना ज्ञानेन्द्र मल्ललाई हटाएर सन्दीप लामिछानेलाई कप्तान चयन गरेको थियो । क्यानले कप्तान मल्लसँगै उपकप्तान दीपेन्द्र सिंह ऐरीलाई समेत जिम्मेवारीबाट हटाउने निर्णय गरेको थियो।
सेन्ट्रल कन्ट्रयाक्टको विषयमा क्यानसँगको सम्झौता विपरित सञ्चारमाध्यममा अभिव्यक्ति दिएको भन्दै मल्लसहित चार खेलाडी कारबाहीमा परेका थिए ।
यस्तै क्यानले मल्ल र दीपेन्द्रसहित सोमपाल कामी र कमल सिंह ऐरीलाई सन् २०२२ को केन्द्रिय सम्झौताबाट सुरुको ६ महिनाको लागि सहभागी नगराउने निर्णय गरेको थियो ।
तर, क्यान खेलाडीको कारबाहीमा केहि लचिलो बनेपछि सहमति बनेको हो ।
.jpg)
