काठमाडौं- नाबालिका एक गायिकालाई बलात्कार आरोपमा मुद्दा खेपिरहेका अभिनेता पल शाहको साधारण तारेख मागसम्बन्धी निवेदनमा उच्च अदालतमा सुनुवाइ सकिएको छ।

पहलको निवेदनमाथि बिहीबार न्यायाधीश उज्ज्वल शुक्ल र श्रीधरा कुमारी पुडासैनीको संयुक्त इजलासमा सुनुवाइ भएको हो। सुनुवाइ सकिएको छ तर, आदेश भने आइसकेको छैन। पीडित बालिका र उनका बाबुले बयान फेरेर बलात्कार नभएको बताएकाले यो मुद्दा कसरी अगाडि बढ्छ भन्ने चासो छ।

पलको तर्फबाट ५ जना र प्रतिवादीको तर्फबाट २ जना वकिलले बहस गरेका छन्। फागुन ११ मा शाहले अदालतमा आत्मसमर्पण गरेका थिए। उनलाई चैत १० मा जिल्ला अदालतले पुर्पक्षका लागि जेल चलान गरेको थियो। उनले चैत १५ मा उच्च अदालतमा बाहिर बसेर मुद्दा लड्न पाउने माग गरी निवेदन दिएका थिए।