काठमाडौँ – फ्रेन्च च्याम्पियन पेरिस सेन्ट जर्मेन (पीएसजी) ले यूईएफए सुपरकपको उपाधि जितेको छ। बुधबार राति इटालीमा भएको रोमाञ्चक फाइनलमा इंग्लिस क्लब टोटनहम हट्सपरलाई पेनाल्टी सुटआउटमा ४–३ ले पराजित गर्दै पीएसजीले पहिलो पटक यो प्रतिष्ठित उपाधि आफ्नो नाममा गरेको हो।

च्याम्पियन्स लिग विजेता पीएसजी र युरोपा लिग विजेता टोटनहमबीचको खेल निर्धारित ९० मिनेटमा २–२ गोलको बराबरीमा सकिएपछि नतिजा टाइब्रेकरबाट निकालिएको थियो।

इटालीको युडिनेजीस्थित ब्लुएनर्जी स्टेडियममा भएको खेलको पहिलो हाफमा टोटनहमले बलियो पकड जमाएको थियो। मिकी भान डे भेन र क्रिस्टियन रोमेरोले गोल गरेपछि इंग्लिस क्लबले २–० को आरामदायी अग्रता लिएको थियो। तर, खेलको अन्त्यतिर पीएसजीले उत्कृष्ट पुनरागमन गर्‍यो। ८५ औं मिनेटमा ली काङ–इनले गोल गर्दै पीएसजीलाई खेलमा फर्काएका थिए। खेलको इन्जुरी समयको चौथो मिनेटमा गोन्सालो रामोसले गोल गर्दै खेललाई बराबरीमा ल्याएपछि प्रतिस्पर्धा टाइब्रेकरतर्फ धकेलिएको थियो।

पेनाल्टी सुटआउटमा पीएसजीका लागि नुनो मेन्डेसले विजयी गोल गरेका थिए। यो जितसँगै पीएसजी यूईएफए सुपरकप जित्ने पहिलो फ्रान्सेली क्लब बन्दै इतिहास रच्न सफल भएको छ। सन् २०२४ मा पीएसजीको यो पाँचौं उपाधि हो।