काठमाडौं - नेपाल र भारतबिच अनलाइनमार्फत व्यक्तिगत रूपमा सिधै रकम ट्रान्सफर गर्न सकिने (Cross-Border P2P Fund Transfer) सेवा सुरु भएको छ । निश्चित बैङ्क तथा वित्तीय संस्थाहरू मार्फत यो सेवा सञ्चालनमा आएको हो ।

नेपाल क्लियरिङ हाउस लिमिटेड (एनसीएचएल) का अनुसार हाल नेपालका ९/१० वटा मुख्य कमर्सियल बैङ्कहरूले आफ्ना ग्राहकलाई यो सुविधा उपलब्ध गराउन थालिसकेका छन् । विगत एक सातादेखि आन्तरिक परीक्षणमा रहेको यो सेवालाई एनसीएचएलले अबको केही दिनभित्रै औपचारिक घोषणा गर्ने तयारी समेत गरेको छ ।

यस क्रसबोर्डर अनलाइन सेवामार्फत रकम पठाउने र पाउने प्रक्रिया तथा यसको सीमा निम्नानुसार रहेको छ:

रकम कसरी पठाउने र पाउने ?
डिजिटल माध्यम: ग्राहकले आफ्नो बैङ्कको मोबाइल बैङ्किङ एप वा कनेक्ट आईपीएस (connectIPS) को मोबाइल एप प्रयोग गरी सहजै रकम पठाउन सक्नेछन् ।

प्रक्रिया: एपभित्र उपलब्ध 'क्रसबोर्डर फन्ड ट्रान्सफर' (Cross-Border Fund Transfer) को विकल्प चयन गर्नुपर्ने हुन्छ ।

आवश्यक विवरण: रकम ट्रान्सफरका लागि प्रापकको बैङ्क खाता नम्बर वा मोबाइल नम्बर जस्ता भर्चुअल पेमेन्ट एड्रेस (VPA) को आवश्यकता पर्दछ ।

को-कसले प्रयोग गर्न पाउँछन् यो सेवा ?
नेपालबाट भारत रकम पठाउन: नेपालमा (हाल नबिल बैङ्कमा) खाता रहेका भारतीय नागरिकहरूले भारतमा रहेका आफ्ना परिवार तथा साथीभाइलाई तत्कालै मोबाइल एपबाट रकम पठाउन सक्नेछन् ।

भारतबाट नेपाल रकम पठाउन: भारतमा रहेका नेपाली तथा भारतीय दुवै नागरिकले नेपालमा रहेका आफ्ना परिवार तथा साथीभाइको बैङ्क खातामा सिधै रकम ट्रान्सफर गर्न सक्नेछन् ।

यस्तो छ कारोबारको सीमा (Transaction Limits)
नबिल बैङ्कले आफ्नो मोबाइल बैङ्किङ एप 'एन बैङ्क' मार्फत सार्वजनिक गरेको विवरण अनुसार कारोबारको सीमा यसप्रकार तोकिएको छ:

नेपालबाट भारत पठाउँदा: दैनिक अधिकतम १५ हजार भारु (INR) र मासिक अधिकतम १ लाख भारु (INR) सम्म मात्र पठाउन सकिनेछ ।

भारतबाट नेपाल पठाउँदा: दैनिक प्रति कारोबार २ लाख भारु (INR) सम्म पठाउन सकिनेछ भने यसको मासिक सीमा तोकिएको छैन (अर्थात् असीमित राखिएको छ) ।

हाल यो सुविधा दुवै देशका निश्चित र मुख्य बैङ्कहरूमा मात्र 'लाइभ' भएको भए तापनि आगामी दिनमा अन्य वाणिज्य बैङ्क, विकास बैङ्क तथा वित्तीय संस्थाहरूमा समेत क्रमशः सेवा विस्तार गरिने एनसीएचएलले जनाएको छ ।