काठमाडौं- संसद्को सबैभन्दा ठूलो दल बनेको नेपाली कांग्रेसबाट दलको नेता को बन्छ (?) भन्नेतर्फ आमचासो बढेको छ । प्रतिनिधिसभामा प्रत्यक्षतर्फ ५७ र समानुपातिकतर्फ ३२ गरी ८९ सिटका साथ पहिलो दल बनेको कांग्रेसबाट संसदीय दलको नेतामा धेरै आकांक्षी छन् । पार्टी सभापति शेरबहादुर देउवा र युवा नेता गगन थापा प्रमुख दाबेदार हुन् भने वरिष्ठ नेता रामचन्द्र पौडेल, शशांक कोइराला, शेखर काेइराला, प्रकाशमान सिंहलगायतले पनि आफ्ना दाबी रहेन बताएका छन् ।

वर्तमान काम चलाउ सरकारमा रहेका गठबन्धन दलहरु पनि कांग्रेस संसदीय दलको नेता को हुन्छ (?) भन्ने प्रतीक्षामै रहेका छन् । सरकार गठनको गाँठो नै कांग्रेस संसदीय दलको नेता को हुने भन्नेमा अड्किएकोले यसतर्फ सबैको चासो बढिरहेका बेला पर्सी (पुस ३ गते) पछि कांग्रेसले दलको नेता चयन प्रक्रिया सुरू गर्दै छ । समानुपातिक सांसदले निर्वाचित भएको प्रमाण पत्र बुझेपछि मात्रै संसदीय दलको नेता चयनका बारेमा छलफल अघि बढाइने कांग्रेसले जनाएको छ।

कांग्रेस सहमहामन्त्री जीवन परियारले संसदीय दलको नेता चयनबारे अनौपचारिक कुराकानी भइरहे पनि औपचारिक छलफल भने पुस ३ गतेपछि मात्रै गरिने जानकारी दिए । संसदीय दलको नेता चयन सहमतिमा गर्ने कि चुनावबाट गर्ने टुंगिएको छैन ।

कांग्रेसमा २०७४ सालको चुनावपछि पनि संसदीय दलको नेता चयनमा चुनाव भएको थियो। यसपालि पनि धेरै सांसदले संसदीय दलको नेता हुने चाहना राखेकोले चुनाव हुन सक्ने देखिएको छ। कांग्रेस विधानअनुसार संसदीय दलको नेता हुन ५१ प्रतिशत मत ल्याउनुपर्छ। ५१ प्रतिशत मत नल्याए पुनः चुनाव गर्ने व्यवस्था छ । कांग्रेसमा गत वर्ष

भएको १४ औं महाधिवेशनलाई आधार मान्ने हो भने सभापति देउवानिकट धेरै जना यसपालि सांसद जितेर आएका छन् ।तर जनताले परिवर्तन चाहेको भन्दै कांग्रेसमा संसदीय दलको नेतामा युवालाई ल्याउनुपर्छ भन्ने पनि छन्। महामन्त्री विश्वप्रकाश शर्माले अर्का महामन्त्री गगन थापालाई संसदीय दलको नेतामा प्रस्ताव गर्ने घोषणा गरिसकेका छन् । अब राष्ट्रपतिले केही दिनमा नयाँ सरकार गठनका लागि दलहरूलाई आह्वान गर्नेछिन्। यसबीचमा दलहरूले स‌ंसदीय दलको नेता चयन गर्नुपर्ने हुन्छ।