काठमाडौं - क्रिकेटर सन्दीप लामिछाने  एसिसी एसिया कपमा सहभागी हुन सोमबार पाकिस्तान प्रस्थान गरेका छन् । सन्दीप कतार एयरवेजको फ्लाइटमार्फत पाकिस्तान प्रस्थान गरेका हुन् । उनी कतारको दोहा हुँदै पाकिस्तानको मुल्तान पुग्नेछन् ।

सन्दीपलाई राष्ट्रिय खेलकुद परिषद् (राखेप) का सदस्यसचिव टंकलाल घिसिङले त्रिभुवन अन्तर्राष्ट्रिय विमानस्थलमा बिदाइ गरेका थिए । 

विमानस्थलमा पत्रकारहरुसँगको कुराकानीमा सन्दीपले आफू एसिया कपका लागि पूर्णरूपमा फिट र तयार रहेको भन्दै पाकिस्तान तथा भारतविरुद्ध उत्कृष्ट प्रदर्शन गर्ने बताए ।
सन्दीप विगत एक वर्ष यता नाबालिग बलात्कारको आरोपमा मुद्दा खेपिरहेका छन् । यो मुद्दाको सुनुवाइ धरै पटक सरिसकेको छ ।

सन्दीपको मुद्दामा आइतबार पेसी तोकिए पनि हेर्न नभ्याइनेमा परेको थियो । मुद्धाको अर्को पेशी भदौ २१ गतेका लागि तोकिएको छ । यसकारण सन्दीपलाई एसिया कपमा सहभागी हुने बाटो खुलेको हो ।

एसिया कपका लागि नेपाली टोली गत मंगलबार नै पाकिस्तान गए पनि सन्दीप भने गएका थिएनन् ।