काठमाडौं - ओमानमा जारी एकदिवसीय अन्तर्राष्ट्रिय क्रिकेटमा नेपालले पपुवा न्यु गिनी बिरुद्ध १५१ रनको फराकिलो जित दर्ता गरेको छ। नेपालका लागि लेगस्पिनर सन्दीप लाछिमानेले घातक बलिङ गर्दै करिअरकै उत्कृष्ट प्रदर्शन गर्दा नेपालले पपुवा न्युगिनीमाथि कीर्तिमानी जित हात पारेको छ । पहिलो खेलमा २ विकेटको जित हासिल गरेको नेपालले सिरिज २-० ले जितेको छ । नेपालका सन्दीप एक्लैले ६ विकेट लिँदा सोमपाल कामी, विक्रम सोब र शुसन भारीले समान १/१ विकेट लिए।

यसअघि टस जितेर पहिले ब्याटिङ गरेको नेपालले ४९ ओभर २ बलमा सम्पूर्ण विकेट गुमाएर २३३ रन बनाएको थियो ।

नेपालका लागि रोहितकुमार पौड्यलले ८६ रनको अर्धशतकीय पारी खेले । १२३ बल खेलेका उनले २ चौका र ३ छक्का प्रहार गरे । त्यस्तै ज्ञानेन्द्र मल्ल ४५ रन बनाए । ७० बल खेलेका उनले ३ चौका र २ छक्का प्रहार गरे । 

नेपालका लागि करण केसीले ४२ रन बनाए । उनले २६ बल खेल्दै २ चौका र ४ छक्का प्रहार गरे । विनोद भण्डारीले नेपालका लागि १७ रन बनाउँदा सोमपाल कामीले ११ रन बनाए ।