२०८२ भदौ १४, शनिवार
२०८२ भदौ १४, शनिवार
काठमाडौं - राष्ट्रिय स्वतन्त्र पार्टी (रास्वपा) ले लिपुलेक, लिम्पियाधुरा र कालापानी नेपाली भूमि भएकोमा आफ्नो अडान 'हिमाल जस्तै अटल' रहेको बताउँदै भारत र चीनबीच लिपुलेक पास हुँदै व्यापार मार्ग पुनः खोल्ने समझदारीप्रति गम्भीर ध्यानाकर्षण भएको जनाएको छ।
मंगलबार पार्टीको अन्तर्राष्ट्रिय सम्बन्ध विभागका प्रमुख शिशिर खनालद्वारा जारी विज्ञप्तिमा सन् १८१६ को सुगौली सन्धि तथा अन्य ऐतिहासिक प्रमाणहरूका आधारमा उक्त भूभाग नेपालको अविभाज्य अंश भएको तथ्यलाई निर्विवाद रूपमा स्थापित गरिएको उल्लेख छ।
"गणतन्त्र भारत र जनवादी गणतन्त्र चीनबीच नेपाली भूभाग लिपुलेक पास हुँदै परम्परागत सीमा व्यापार मार्ग पुनः खोल्ने विषयमा भएको हालैको सम्झौतापछि नेपाल सरकारले प्रस्तुत गरेको रवैयाप्रति राष्ट्रिय स्वतन्त्र पार्टीको गम्भीर ध्यानाकर्षण भएको छ," विज्ञप्तिमा भनिएको छ।
रास्वपाले यो संवेदनशील विषयलाई उच्च प्राथमिकताका साथ सम्बोधन गर्ने दायित्व नेपाल सरकारको भएको स्मरण गराउँदै सरकारले देखाएको अनिच्छाप्रति आशंका व्यक्त गरेको छ। पार्टीले संसदमा नक्सा र राष्ट्रियताको विषय उठाउँदा सरकारले देखाएको उदासीनताले देशभित्र सरकारको तयारीबारे सन्देह र प्रश्नहरू उब्जिएको जनाएको छ।
विज्ञप्तिमा प्रधानमन्त्रीको आसन्न भारत तथा चीन भ्रमणका क्रममा सम्बन्धित नेतृत्वसँग लिपुलेक, लिम्पियाधुरा र कालापानी क्षेत्रको प्रश्न स्पष्ट र दृढतापूर्वक प्रस्तुत गर्न माग गरिएको छ।
"नेपालको राष्ट्रिय अखण्डता, सार्वभौमिकता र भौगोलिक स्वाधीनताको संरक्षणलाई राष्ट्रिय स्वतन्त्र पार्टी सर्वोच्च दायित्व मान्दछ। नेपाली भूभागमाथि अन्य देशहरूको कुनै पनि गतिविधि वा सम्झौता नेपालको प्रत्यक्ष सहभागिता र सहमति बिना वैध मान्न सकिँदैन," विज्ञप्तिमा उल्लेख छ।
रास्वपाले विवादहरूको समाधान शान्तिपूर्ण र कूटनीतिक माध्यमबाट खोजिनुपर्ने आफ्नो अटल सिद्धान्तमा प्रतिबद्ध रहेको बताउँदै यस विषयमा सरकारलाई आवश्यक पर्ने सहयोग गर्न तयार रहेको समेत जानकारी गराएको छ।
