काठमाडौं -  उपत्यकामा निषेधाज्ञाको समय थप गर्ने निर्णय गरिएको छ । काठमाडौं,ललितपुरका र भक्तपुर जिल्लाका  प्रमुख जिल्ला अधिकारीले बुधवार निषेधाज्ञा लम्ब्याउने निर्णय गरेका हुन् ।  अब जेठ ३१ सम्म उपत्यकामा निषेधाज्ञा लागु हुने छ। 

वैशाख १६ बाट जारी  निषेधाज्ञालाई निरन्तरता दिँदै जेठ १४ बाट सो आदेशलाई थप कडा पारिएको थियो । जेठ १४ बाट उपत्यकामा बन्द गरिएको खाद्यान्न,किराना तथा डिपार्टमेन्ट स्टोर खोल्न दिने निर्णय गरिएको भक्तपुरका प्र.जि.अ. प्रेम प्रसाद भट्टराईले बताएका छन।  अब किराना र डिपार्टमेन्ट स्टोर बिहान ९ बजेसम्म खोल्न दिने निर्णय गरिएको प्र.जि.अ. भट्टराईले बताए । 
बैठकमा काठमाडौंका प्र.जि.अ. कालीप्रसाद पराजुली,ललितपुरका प्र.जि.अ. ढुण्डीप्रसाद निरौला र भक्तपुरका प्र.जि.अ. प्रेम प्रसाद भट्टराई सहभागी थिए । सार्वजनिक निर्माणलाई खुल्ला गर्ने निर्णय भएको छ । सार्वजनिक निर्माण बन्द हुँदा सामग्री ढुवानीका सवारी-साधन पनि रोकिएका थिए । निर्माण सामग्री रातको समयमा मात्र ढुवानी गर्न दिने निर्णय गरिएको छ ।

मंगलबार प्रमुख जिल्ला अधिकारीहरुले निषेधाज्ञा तत्काल खुल्ला गर्ने अवस्था नआएको निष्कर्ष निकालेका थिए ।