धनगढी। सुदूरपश्चिम प्रदेश सभामा चालु आर्थिक वर्षको बजेट पारित भएकै दिन सत्ता साझेदार नेकपा (एमाले) का सांसद एवम् पूर्वमन्त्री वीरबहादुर थापाले पदबाट राजीनामा दिएका छन्।

बजेटको बाँडफाँड र प्रक्रियाप्रति गम्भीर असन्तुष्टि जनाउँदै थापाले प्रदेश सभाका सभामुखसमक्ष राजीनामा बुझाएका हुन्। तर, उनको राजीनामा अहिलेसम्म स्वीकृत भइसकेको छैन। थापाको राजीनामा स्वीकृत नगर्न र निर्णय फिर्ता लिन एमालेका शीर्ष नेतृत्व तथा केन्द्रबाट तीव्र दबाब दिइरहेको स्रोतले जनाएको छ।

मङ्गलबार सुदूरपश्चिम प्रदेश सभाबाट चालु आर्थिक वर्षको बजेट पारित भएको छ। सत्तापक्षभित्रै बजेटलाई लिएर असन्तुष्टि चुलिएपछि बजेटमाथि छानबिन समिति गठन गर्ने र पूरक बजेट ल्याउने सत्तारूढ दलहरूबीच सहमति बनेको थियो।