काठमाडौं- बंगलादेशको ढाकामा आयोजना हुने एसियन सिनियर सेन्ट्रल जोन पुरुष तथा महिला भलिबल च्यालेन्ज कप अन्तर्गत पुरुषतर्फको खेल तालिका परिवर्तन भएको छ । माल्दिभ्सले प्रतियोगितामा सहभागिता नजनाउने भएपछि पुरुषतर्फको खेल तालिका परिवर्तन भएको हो ।

पुरुषतर्फ चार टिमले मात्र प्रतिस्पर्धा गर्ने छन् । पुरुषमा आयोजक बंगलादेश, नेपाल, श्रीलंका र उज्वेकिस्तानले प्रतिस्पर्धा गर्नेछन् । खेल तालिका परिवर्तन भएसँगै नेपालले पहिलो खेलमा बंगलादेशसँग खेल्ने भएको छ । नेपाल र बंगलादेशबीचको खेल भोलि (बिहीबार) हुनेछ । यस्तै नेपालले दोस्रो खेलमा उज्वेकिस्तान र अन्तिम खेलमा श्रीलंकासँग खेल्नेछ । राउण्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्ने छन् । यस्तै तेस्रो र चौंथो टोलीले तेस्रो स्थानको लागि प्रतिस्पर्धा गर्ने छन् ।