२०८१ चैत २१, शुक्रबार
२०८१ चैत २१, शुक्रबार
काठमाडाैँ- नेपाली कांग्रेस संसदीय दलको नेतामा पार्टी सभापति शेरबहादुर देउवा निर्वाचित भएका छन् । संसदीय दलको नेता तथा कार्यसमिति निर्वाचन समितिका संयोजक भीष्मराज आङ्देम्बेका अनुसार बुधबार सम्पन्न निर्वाचनमा ६४ मत प्राप्त गरी प्रधानमन्त्री देउवा निर्वाचित भएका हुन् ।
संसदीय दलको नेतामा उम्मेदवारी दिनुभएका कांग्रेस महामन्त्री गगनकुमार थापाले २५ मत प्राप्त गरे । कांग्रेस संसदीय दलको नेता चयनका लागि ८९ जना सांसदले मतदान गरेका थिए । प्रतिनिधि सभाको पहिलो दल कांग्रेसका सभापति देउवाको प्रस्तावकमा वरिष्ठ नेता रामचन्द्र पौडेल र समर्थक उपसभापति पूर्णबहादुर खड्का थिए । महामन्त्री थापाका प्रस्तावकमा केन्द्रीय सदस्य डा. शेखर कोइराला र समर्थकका रूपमा उपसभापति धनराज गुरुङ, महामन्त्री विश्वप्रकाश शर्मा र केन्द्रीय सदस्य प्रदीप पौडेल थिए । कांग्रेसको विधानमा संसदीय दलको नेता प्रधानमन्त्री पदको उम्मेदवार हुने व्यवस्था छ ।
छैटौँ पटक प्रधानमन्त्रीको बाटो तय
देउवाले छैटौंपटक प्रधानमन्त्री हुने बाटो तय गरेका छन् । गठबन्धन दलहरूलाई मिलाएर नयाँ सरकारको नेतृत्व गर्ने कसरतमा लागेका देउवालाई संसदीय दलको नेतामा निर्वाचित भएसँगै आगामी प्रधानमन्त्रीको बाटो खुलेको हो ।
०५१ सालमै तत्कालीन पार्टी सभापति गिरिजाप्रसाद कोइरालाले युवा नेता देउवालाई संसदीय दलको नेतामा अघि सारेपछि उनले ४९ वर्षको उमेरमै देशको प्रधानमन्त्री बन्ने अवसर पाए । तत्कालीन चुनावपछि छोटो समयका लागि प्रधानमन्त्री बने पनि तत्कालीन माओवादी द्वन्द्व व्यवस्थापनमा भट्टराई र कोइरालालाई असहज परिस्थिति बनेसँगै देउवा दोस्रो र तेस्रोपटक प्रधानमन्त्री बन्न सफल भएका थिए ।
पार्टीभित्रको समीकरणलाई सहज बनाउन सभापति कोइरालाले ०५६ मा नेता कृष्णप्रसाद भट्टराईलाई चुनावअघि नै प्रधानमन्त्रीको उम्मेदवार घोषणा गरे । ०६२-६३ को परिवर्तनपछि देउवा दुईपटक प्रधानमन्त्री भइसकेका छन् । यसरी पाँचाैं पटक प्रधानमन्त्री हुनुभएका देउवालाई पुनः प्रधानमन्त्रीको बाटो खुलेको छ ।
उनी अब कांग्रेसको तर्फबाट प्रधानमन्त्रीको उम्मेदवार बन्नेछन् । ‘हामी संसद्को सबैभन्दा ठूलो दल भएकाले र वर्तमान सत्ता गठबन्धनमा सहभागी सबै पार्टीहरूले मान्न सक्ने नेता कांग्रेस सभापति तथा संसदीय दलका नेता शेरबहादुर नै भएकाले उहाँलाई प्रधानमन्त्री बन्न सहज छ,’ केन्द्रीय सदस्य एनपी साउँदले भने, ‘अब सरकार बनाउने विषयमा गठबन्धन र गठबन्धनभन्दा बाहिर रहेका दलहरूसँग समेत छलफल गरेर अघि बढ्नेछौं ।’
.jpg)
