काठमाडौं – सरकारले सिमकार्ड वितरण र प्रयोगलाई थप व्यवस्थित तथा सुरक्षित बनाउन नयाँ प्रक्रिया सुरु गरेको छ ।
 अबदेखि सिमकार्ड दर्ता प्रक्रियालाई राष्ट्रिय परिचयपत्र प्रणालीसँग एकीकृत गरिने भएको छ, जसबाट कुन व्यक्तिको नाममा कतिवटा सिमकार्ड सञ्चालनमा छन् भन्ने कुरा सजिलै पहिचान गर्न सकिनेछ ।

सञ्चार तथा सूचना प्रविधि मन्त्रालयकी सचिव तथा नेपाल दूरसञ्चार प्राधिकरणकी अध्यक्ष राधिका अर्यालले मंगलबार राष्ट्रिय सभाको विकास, आर्थिक मामिला तथा सुशासन समितिमा यो जानकारी दिनुभएको हो । उहाँका अनुसार, हाल सिमकार्ड लिँदा ग्राहक पहिचान विवरण (KYC) अनिवार्य गरिएको भए पनि अब त्यसलाई राष्ट्रिय परिचयपत्रको केन्द्रीय तथ्याङ्क प्रणालीसँग आबद्ध गरिनेछ ।
"यो प्रणाली लागू भएपछि एउटै व्यक्तिको नाममा जारी भएका सबै सिमकार्डको विवरण स्वतः देखिन्छ," सचिव अर्यालले भन्नुभयो, "यसले एक व्यक्तिलाई अधिकतम कतिवटा सिमकार्ड उपलब्ध गराउने भन्ने विषयमा स्पष्ट नीति निर्माण गर्न पनि बलियो आधार प्रदान गर्नेछ ।"

हाल एउटै नागरिकको परिचयपत्र प्रयोग गरेर धेरै सिमकार्ड निकाल्ने र त्यसलाई आपराधिक तथा गैरकानुनी गतिविधिमा दुरुपयोग गर्ने प्रवृत्ति बढेको छ । यस्तो कार्यले वित्तीय ठगी, धम्की तथा अन्य सामाजिक अपराधमा समेत वृद्धि भएको छ ।
मन्त्रालयको यो कदमको मुख्य उद्देश्य नै यस्तो दुरुपयोगलाई पूर्ण रूपमा नियन्त्रण गर्नु हो । अर्यालले एउटा व्यक्तिको पहिचानमा निकालिएका सिमकार्ड अन्य व्यक्तिले प्रयोग गरी अपराध गर्ने कार्यलाई निरुत्साहित गर्न यो नयाँ व्यवस्था निकै प्रभावकारी हुने विश्वास व्यक्त गर्नुभयो । राष्ट्रिय परिचयपत्रसँगको एकीकरणले सिमकार्ड प्रयोगकर्ताको पहिचानलाई थप विश्वसनीय र पारदर्शी बनाउने अपेक्षा गरिएको छ ।