काठमाडौँ- रवि लामिछाने नेपाली नागरिकताको प्रमाणपत्र लिन आज जिल्ला प्रशासन कार्यालय काठमाडौँ जाने भएका छन् । अवैध नागरिकतासम्बन्धी मुद्दामा सर्वोच्च अदालतको फैसलाबाट संसद् तथा सरकारबाट बहिर्गमनमा परेका लामिछानेले आज नागरिकता पुनः प्राप्तिको प्रक्रिया थाल्ने भएका हुन् । 

राष्ट्रिय स्वतन्त्र पार्टीकाअनुसार लामिछानेले आज जिल्ला प्रशासन कार्यालय काठमाडौँबाट नेपाली नागरिकताको प्रमाणपत्र लिन निवेदन दिनेछन् । प्रशासनले अमेरिकाको नागरिकता त्यागेको निस्सा, पुराना नागरिकताको प्रमाणपत्र र प्रतिलिपि, फोटो र भर्नुपर्ने निस्साको फारम भरेर पेस गर्नु भनी समन्वय गरेको छ । सम्भवतः लामिछानेले केही घण्टामै नागरिकता पाउन सक्ने गृह प्रशासन स्रोतले जनाएको छ ।

अमेरिकी नागरिकता त्यागे पनि नेपालको नागरिकता पुनः प्राप्तिको प्रक्रिया पूरा नगरी राष्ट्रिय स्वतन्त्र पार्टीको सभापति तथा सांसद बनेका लामिछानेको नागरिकता अवैध ठहर भएपछि उनको सांसदसँगै मन्त्री पद सर्वोच्च अदालतको संवैधानिक इजलासले खारेज गरिदिएको थियो ।