काठमाडौं - निर्वाचन आयोगले प्रतिनिधि सभातर्फको समानुपातिक सिटको अन्तिम नतिजा सार्वजनिक गर्दै ६ वटा राष्ट्रिय दलले पाउने सांसदको सङ्ख्या टुङ्गो लगाएको छ। आयोगका प्रवक्ता नारायणप्रसाद भट्टराईले विज्ञप्ति जारी गर्दै दलहरूले प्राप्त गरेको मतका आधारमा सिट सङ्ख्या बाँडफाँड गरिएको जानकारी दिएका हुन्।

राष्ट्रिय स्वतन्त्र पार्टीको ऐतिहासिक फड्को
आयोगको तथ्याङ्कअनुसार यसपटक समानुपातिकतर्फ राष्ट्रिय स्वतन्त्र पार्टी (रास्वपा) सबैभन्दा ठुलो शक्तिका रूपमा उदाएको छ। रास्वपाले ५७ सिटसहित संसद्‌मा बलियो उपस्थिति जनाउने भएको छ।

त्यसैगरी, परम्परागत शक्तिहरू नेपाली कांग्रेसले २० र नेकपा एमालेले १६ सिट सुरक्षित गरेका छन्। अन्य राष्ट्रिय दलहरूमा नेकपाले ९ सिट पाउँदा श्रम संस्कृति पार्टी र राष्ट्रिय प्रजातन्त्र पार्टी (राप्रपा) ले समान ४/४ सिट प्राप्त गरेका छन्।

नाम सिफारिस गर्न तीन दिनको समय
आयोगले सिट सङ्ख्याको टुङ्गो लगाएसँगै सम्बन्धित दलहरूलाई बन्दसूचीमा रहेका उम्मेदवारहरूमध्येबाट समावेशी सिद्धान्तका आधारमा सांसदको नाम छनोट गर्न निर्देशन दिएको छ। दलहरूले अबको तीन दिनभित्र आफ्ना उम्मेदवारहरूको नामावली आयोगमा बुझाउनुपर्नेछ।