काठमाडौं। नेपाली कांग्रेसले प्रतिनिधिसभा अन्तर्गतको राज्य व्यवस्था तथा सुशासन समितिको रिक्त सभापति पदमा सांसद दिलेन्द्रप्रसाद बडुलाई पठाउने तयारी गरेको छ। यद्यपि, यसबारे अन्तिम निर्णय भइनसकेको कांग्रेसका प्रमुख सचेतक श्यामकुमार घिमिरेले जानकारी दिए।

पूर्वमन्त्री समेत रहेका बडुलाई सभापति बनाउने विषयमा पार्टीभित्र गृहकार्य सुरु भइसकेको समितिका एक सदस्यले बताए।

सभामुख देवराज घिमिरेले समितिको सभापति चयनका लागि बुधबार निर्वाचनको मिति तोकेका छन्। सत्ता गठबन्धनमा भएको सहमति अनुसार यो समिति कांग्रेसको भागमा परेको हो। संसदीय नियमावली अनुसार, सभापति पद रिक्त भएको १५ दिनभित्र निर्वाचन गरिसक्नुपर्ने प्रावधान छ।

यसअघिका सभापति रामहरि खतिवडाले संघीय निजामती सेवा विधेयकको ‘कुलिङ अफ पिरियड’ सम्बन्धी व्यवस्थामा छेडखानी भएको विषयमा छानबिन समितिले नैतिक रूपमा जिम्मेवार ठहराएपछि गत साउन २८ गते पदबाट राजीनामा दिएका थिए।