क्वालालम्पुर - ओपनर प्रसिद्ध जैसीको कीर्तिमानी शतक र कप्तान बिपिन शर्माको घातक बलिङको मद्दतमा नेपालले एसीसी मेन्स यू-१६ इस्ट जोन कपमा इन्डोनेसियालाई ३७० रनको विशाल अन्तरले पराजित गरेको छ ।

यो जितसँगै नेपालले ५० ओभरको क्रिकेटमा आफ्नो अहिलेसम्मकै सबैभन्दा ठूलो योगफल बनाउने कीर्तिमान पनि रचेको छ ।

क्वालालम्पुरस्थित सेलांगर टर्फ क्लबमा टस हारेर पहिले ब्याटिङको निम्तो पाएको नेपालले निर्धारित ५० ओभरमा ५ विकेट गुमाएर ४२० रनको विशाल योगफल तयार पारेको थियो । नेपालका लागि प्रसिद्ध जैसीले ११४ बलमा १५ चौका र १ छक्कासहित १३२ रनको सानदार शतकीय पारी खेले ।

त्यस्तै, अर्का ओपनर परिमार्जन यादवले मात्र २८ बलमा ४ चौका र ८ छक्कासहित ७१ रनको विस्फोटक ब्याटिङ गरे । रौनक श्रीवास्तवले ८८ रन तथा जोय थापाले ५७ रनको योगदान दिए । पहिलो विकेटका लागि जैसी र यादवले १३० रनको साझेदारी गर्दै उत्कृष्ट सुरुवात दिलाएका थिए ।

नेपालले दिएको ४२१ रनको असम्भवप्रायः लक्ष्य पछ्याएको इन्डोनेसिया २४.३ ओभरमा मात्र ५० रनमा अलआउट भयो । इन्डोनेसियालाई सस्तैमा समेट्ने क्रममा कप्तान बिपिन शर्माले घातक बलिङ गरे । उनले ७.३ ओभरमा मात्र १२ रन खर्चेर ६ विकेट लिए । शुभम खनाल र सुगम बुढाथोकीले १-१ विकेट हात पारे । इन्डोनेसियाका लागि कविन नीरजले सर्वाधिक १५ रन बनाए ।

यो जितसँगै समूह 'ए' मा रहेको नेपालले लगातार तेस्रो जित निकालेको छ । ३ खेलबाट ६ अंक जोडेको नेपाल शीर्ष स्थानमा छ र सेमिफाइनल नजिक पुगेको छ । यसअघि नेपालले सिंगापुर र जापानलाई पराजित गरेको थियो । अब नेपालले समूह चरणको अन्तिम खेल भुटानसँग खेल्नेछ ।