काठमाडौँ -नेपाली काँग्रेसले सभामुख पदको निर्वाचनमा पार्टीबाट तर्फबाट उम्मेदवारी दिने कि नदिने भन्नेबारे आन्तरिक छलफल सुरु गरेको छ। यही माघ ५ गते सभामुख चयनका लागि निर्वाचन हुँदैछ।

प्रधानमन्त्री पुष्पकमल दाहाल ‘प्रचण्ड’लाई गत पुस २६ मा विश्वासको मत दिएको काँग्रेसले अब हुने सभामुख पदमा उम्मेदवारी दिन्छ कि दिँदैन चासोसाथ हेरिएको छ। काँग्रेस केन्द्रीय कार्यसम्पादन र संसदीय दलले प्रधानमन्त्री प्रचण्डलाई विश्वासको मत दिने तर पार्टी प्रतिपक्षी भूमिकामै बस्ने निर्णय गरेको थियो।

सभापति शेरबहादुर देउवाले पार्टी पदाधिकारी तथा पूर्वपदाधिकारीहरूसँग सभामुख पदमा उम्मेदवारी दिने वा नदिनेबारे सुझाव लिइरहेका छन्। बिहीबार दिउँसो २ बजे देउवा निवास धुम्बाराहीमा यसबारे सभापति देउवाले पदाधिकारी तथा पूर्वपदाधिकारीसँग छलफल गर्दैछन्।

सभामुख पदमा उम्मेदवारी दिँदा कसलाई अघि सार्ने भन्ने पनि छलफल भइरहेको छ।

प्रवक्ता प्रकाशशरण महतले सभामुखमा उम्मेदवारी दिने कि नदिने भन्नेबारे आन्तरिक छलफल भइरहेको र निर्णय हुन केही समय लाग्ने बताए।

प्रधानमन्त्रीलाई विश्वासको मत दिए काँग्रेसले सत्ता साझेदार दलसँग कुनै पदमा बार्गेनिङ नगरेको दाबी गर्दै आएको छ। प्रधानमन्त्री प्रचण्डले पनि काँग्रेससँग कुनै सम्झौताबिना नै विश्वासको मत प्राप्त भएको प्रतिक्रिया दिएका थिए।

प्रवक्ता महतले प्रदेशहरूमा पनि सभामुखलगायत पदमा उम्मेदवारी दिने तयारी रहेको बताए। काँग्रेस सातै प्रदेशमा प्रतिपक्षी भूमिकामा छ। केन्द्रमा सरकारलाई समर्थन गरे पनि कुनै पनि प्रदेश सरकारलाई काँग्रेसले समर्थन गरेको छैन।

बागमती प्रदेशलगायतमा सभामुख पदमा उम्मेदवारी दिने तयारीमा काँग्रेस जुटेको छ।

सत्ता साझेदार दलभित्र सभामुख नेकपा एमालेले लिने सहमति भएका विषय बाहिरिएका थिए। काँग्रेसले पार्टीभित्र छलफल गर्ने र प्रधानमन्त्री लगायतसँग पनि यसबारे छलफल गरेर अघि बढ्ने रणनीति लिएको छ।

राष्ट्रपतिमा सत्ता साझेदार दलहरूबाट सहयोग पाउने हो भने सभामुख छाडेर जानुपर्ने तर्क पनि काँग्रेसका केही नेताहरूले राख्ने गरेका छन्। तर प्रवक्ता महतले कुन पद लिने भनेर आफूहरूले कसैसँग केही कुरा नगरेको दाबी गरेका छन्।