काठमाडौं । लोकदोहोरी गायक दीपक खड्काको पछिल्लो नयाँ गीत ‘छड्के सलाम’ को भिडियो सार्वजनिक भएको छ । गीतका शव्द भीम विष्टले कोरेका हुन् भने दीपकले नै संगीत भरेका छन् ।

साथै, श्यामश्वेत रसाइलीले संगीत संयोजन गरेको गीतमा संगीतकार दीपकसँगै गीतकार भीम, प्रिति आले र सरु गौतमले आवाज दिएका छन् । इनाक्षी इन्टरटेनमेन्टको युट्युब च्यानलमार्फत उक्त गीतको भिडियो सार्वजनिक गरिएको हो । काजिश श्रेष्ठको भिडियोको निर्देशन गरेका छन् भने अर्जुन तिवारीले छायांकन गरेका हुन् ।

त्यसैगरी, दीपक विष्टले सम्पादन गरेको सो भिडियोमा नायक पल शाह, अञ्जली अधिकारी, सुधीर श्रेष्ठ, अशुं न्यौपाने र सोही गीतका गायक गायिकाहरु दीपक, भीम, प्रिति र सरुले अभिनय गरेका छन् ।

नायक पल शाह यस भिडियोमा फरक गेटअपमा देखिएको गायक तथा संगीतकार दीपकले बताए । उनका अनुसार नेपाली गीत–संगीतको मौलिकतालाई मान्यता दिँदै दर्शक स्रोतालाई पनि छुट्टै मनोरञ्जन दिने लक्ष्य राखेर यस गीत र भिडियो बजारमा ल्याइएको हो । साथै, भिडियो चितवनको नारायणगढ र गैँडाकोटबीच नारायणी नदीको रमणीय एवं पर्यटकीयस्थलमा छायांकन गरिएको छ ।