२०८२ भदौ १४, शनिवार
२०८२ भदौ १४, शनिवार
काठमाडौं - उपसभामुख इन्दिरा राना मगरको गैरसरकारी संस्थासँग सम्बन्धित एक पुरानो घटना प्रहरीको अनुसन्धानको दायरामा आएको छ। उनी पदमा निर्वाचित हुनुभन्दा अघि नेपाल बाल संगठनबाट उनको संस्थामा केही बालबालिका सारिएको विषय सार्वजनिक भएपछि प्रहरीको केन्द्रीय अनुसन्धान ब्यूरो (सीआईबी) ले यसबारे चासो देखाउँदै प्रारम्भिक अनुसन्धान सुरु गरेको हो।
हाल सत्तारुढ गठबन्धनभित्र अमेरिकी दूतावासलाई लेखेको पत्रका कारण विवादमा रहेकी उपसभामुख मगरमाथि यो नयाँ विषयले थप दबाब सिर्जना गरेको छ। यही राजनीतिक उथलपुथलका बीच प्रहरीले पुरानो मुद्दामा अनुसन्धान अघि बढाएको हो, जसले घटनाको संवेदनशीलतालाई थप बढाएको छ।
प्रहरीको केन्द्रीय अनुसन्धान ब्यूरो (सीआईबी) ले यस मामिलामा अनुसन्धान भइरहेको पुष्टि गरेको छ। सीआईबी प्रमुख, प्रहरी अतिरिक्त महानिरीक्षक (एआईजी) चन्द्रकुवेर खापुङका अनुसार, सार्वजनिक रूपमा प्रश्न उठेकाले वास्तविकता पत्ता लगाउन अनुसन्धान थालिएको हो। "सीआईबी अन्तर्गतको मानव बेचबिखन अनुसन्धान ब्यूरोले पनि यसबारे अध्ययन गरिरहेको छ," खापुङले भने, "प्रश्न उठिसकेपछि के रहेछ भनेर जान्नलाई समेत बुझ्ने काम भइरहेको हो।"
यसैगरी, मानव बेचबिखन अनुसन्धान ब्यूरोका एसपी नरेन्द्र कुँवरले पनि प्रारम्भिक चरणमा जानकारी संकलनको काम सुरु भएको बताएका छन्। "बच्चाहरू हाल कहाँ छन् र घटनाको यथार्थ के हो भन्ने विषयमा हामीले जानकारी जुटाउन थालेका छौं," उनले स्पष्ट पारे।
यो विवादको जड नेपाल बाल संगठनमाथि विगतमा लागेको अनियमितताको आरोपसँग जोडिएको छ। सन् २०२० (वि.सं. २०७७) मा संगठनका एक अधिकारीले अवैध रूपमा एक बेलायती नागरिकलाई बच्चा दिएको आरोपमा पक्राउ परेपछि सरकारले छानबिन गर्न पूर्वन्यायाधीश हरिबाबु भट्टराईको अध्यक्षतामा एक उच्चस्तरीय समिति गठन गरेको थियो।
सोही समितिको प्रतिवेदनमा समावेश गरिएको बयानमा बाल संगठनकी तत्कालीन प्रमुख रीता सिंह वैद्यले इन्दिरा राना मगरको संस्थालाई बालबालिका दिइएको उल्लेख गरेकी थिइन्। वैद्यले आफ्नो बयानमा आर्थिक संकटका बेला मगरको संस्थाले सहयोगको प्रस्ताव गरेको बताएकी छन्।
रीता सिंह वैद्यको बयान जस्ताको तस्तै:
"बालगृहमा आश्रित बालबालिकालाई अन्य बालगृहमा लैजाने विषयमा विशेषतः जेलको बच्चाहरूलाई सारेको भन्ने थाहा छ। इन्दिरा रानाको संस्थाले ‘बाल संगठनलाई गाह्रो छ, मलाई अलिकति बच्चाहरू दिनुस्, म राख्छु’ भनेकोले ३ जना कि ५ जना बच्चाहरू पठाएको हो। मैले पनि उहाँको संस्थामा हेरेँ। राम्रो सुविधा रहेछ। अनि पठाएको हो। छात्रवृत्तिसहित खुशी घर संस्थालाई (एडप्सन रोकिएको बेला) हामीसँग पैसा नभएर गाह्रो भएका बेला बच्चाहरू पठाएको हो। मलाई पछि जानकारी आयो, त्यहाँ राम्रो सुविधा थियो, विदेशीहरूको राम्रो सहयोग थियो। पछि मैले ल्याउँछौं पनि भनेको हो। बच्चाहरू नै आउन मानेनन्।"
