२०८२ असोज २९, बुधबार
२०८२ असोज २९, बुधबार
काठमाडौँ - राष्ट्रिय स्वतन्त्र पार्टी (रास्वपा) का पूर्वमहामन्त्री मुकुल ढकालले सर्वोच्च अदालतले आफ्नो रिट निवेदन खारेज गरे पनि कानुनी र राजनीतिक लडाइँ जारी राख्ने घोषणा गरेका छन्। अदालतको फैसलापछि सामाजिक सञ्जाल फेसबुकमा एक स्टाटस लेख्दै उनले पार्टीलाई ‘रहस्यमयी आगन्तुक’बाट बचाउन अन्तिमसम्म प्रयास गर्ने प्रतिबद्धता व्यक्त गरेका हुन्।
ढकालले आफ्नो स्टाटसमा सम्मानित सर्वोच्च अदालतले रिट खारेज गर्दै निर्देशनात्मक आदेश जारी गरेको उल्लेख गरेका छन्। फैसलाको पूर्णपाठ आउन बाँकी रहेको र त्यो प्राप्त भएपछि मात्र आवश्यक कदम चाल्ने उनले बताएका छन्। उनले लेखेका छन्, "कानूनले दिएको अन्तिम अवसरसम्म म आफ्नो लडाइँ जारी राख्नेछु।" यसले उनी अझै पनि कानुनी उपचारको खोजीमा रहने सङ्केत गर्छ।
उनले पार्टीभित्र देखिएको समस्याप्रति कडा टिप्पणी गर्दै आफ्नो लडाइँ पार्टी शुद्धीकरणका लागि भएको आशय व्यक्त गरेका छन्। ढकालले भनेका छन्, "पुरानो पार्टीबाट म्याण्डेट लिई ‘गङ्गा स्नान’ गर्न पार्टीमा आएका रहस्यमयी आगन्तुकहरूको कब्जाबाट पार्टीलाई बचाउन म अन्तिमसम्म प्रयास गर्नेछु।" उनको यो भनाइले रास्वपाभित्र अन्य राजनीतिक दलबाट आएका व्यक्तिहरूको प्रभाव र गतिविधिप्रति उनको गम्भीर असन्तुष्टि रहेको देखाउँछ।
ढकालले आफ्नो रिट खारेज गर्ने न्यायाधीश र पार्टी सभापति रवि लामिछानेलाई पूर्पक्षका लागि थुनामा राख्ने उच्च अदालतको आदेश सदर गर्ने न्यायाधीश एउटै व्यक्ति भएको रोचक तथ्य सार्वजनिक गरेका छन्।
उनले दोहोरो मापदण्ड अपनाउन नहुनेमा जोड दिँदै लेखेका छन्, "हिजो रवि दाइलाई थुन्दा ‘झोले’ न्यायाधीश ठहरिने, र आज मेरो रिट खारेज गर्दा ‘महान्’ ठहरिने – यस्तो हुँदैन।" उनले जुनसुकै अवस्थामा पनि अदालतको सम्मान गर्नुपर्ने र न्यायाधीशहरू न्यायका मूर्ति हुन् भन्ने कुरा एक राजनीतिक कार्यकर्ताले बुझ्नुपर्ने बताएका छन्। उनले अदालतलाई विवादमा तान्नुको सट्टा नीतिगत सुधारमार्फत बेथिति हटाउनुपर्नेमा जोड दिएका छन्।
उनले आफू र रवि लामिछानेमाथि एउटै शक्तिले प्रतिशोध साँधिरहेको हुनसक्ने आशङ्का व्यक्त गरेका छन्। "यदि रवि दाइमाथि राजनीतिक प्रतिशोध साँधिएको भनेर मान्ने हो भने, त्यही शक्ति जसले रवि दाइलाई जेलमा राख्न चाहन्छ, त्यसैले मलाई पनि पार्टीबाट बहिर्गमन गरायो," उनले लेखेका छन्।
तर, यस्ता विषयमा मात्र अल्झिँदा पार्टी राष्ट्र निर्माणको मूल उद्देश्यबाट टाढा भइरहेकोमा उनले चिन्ता व्यक्त गरेका छन्। उनले भने, "पछिल्लो एक वर्षमा हामी राष्ट्र निर्माणको मूल उद्देश्यबाट टाढा भइरहेछौँ।"
अन्तमा, उनले आफ्नो सङ्घर्ष नरोकिने संकेत दिँदै भनेका छन्, "हिँड्दा कहिलेकाहीँ लडिन्छ, तर लड्यो भने पनि उठेर फेरि हिँड्न सक्नुपर्छ, अनि हिँडिन्छ।"
