२०८१ चैत २१, शुक्रबार
२०८१ चैत २१, शुक्रबार
बाशिङटन: अमेरिकी राष्ट्रपति जो बाइडनले अगस्त ३१ तारिखमा अफगानिस्तानमा अमेरिकी कारबाही अन्त्य हुने बताउँदै सेना फिर्ता लिने आफ्नो निर्णयको बचाउ गरेका छन् ।
युद्धको निरीक्षण गर्ने चौथो अमेरिकी राष्ट्रपति बाइडनले जीवन जोगाएको भन्दै अफगानिस्तानबाट सेना फर्किरहेको गतिको समेत बचाउ गरेका छन् ।
सन् २००१ को सेप्टेम्बर ११ तारिखमा अमेरिकामा भएको आतंकवादी आक्रमण पश्चात अमेरिकी सेनाले झन्डै २० वर्ष अफगानिस्तानमा युद्ध गरेको थियो ।
यसै वर्षको सुरुवाततिर, सन् २०२१ को सेप्टेम्बर ११ भित्रमा अमेरिकी सेना त्यहाँबाट पूर्ण रूपमा फर्किसक्ने बाइडनले समय सीमा तोकेका थिए ।
अमेरिकाका पूर्व राष्ट्रपति डोनल्ड ट्रम्पले सन् २०२१ को मे महिनाभित्र अमेरिकी सेना अफगानिस्तानबाट फर्किसक्ने तालिबानसँग सहमति गरेको थिए ।
तर गत जनवरीमा पदभार ग्रहण गरेपछि बाइडनले त्यो समय सीमालाई केही पर धकेलिदिएका थिए ।
ह्वाइट हाउसबाट गरिएको सम्बोधनका क्रममा उनले तालिबानको अधिग्रहण ‘अपरिहार्य’ रहेको भनाइ अस्वीकार गरेका छन् ।
झन्डै ३ लाख अफगान सुरक्षा फौजका अगाडि ७५ हजार लडाकु रहेको तालिबानको मेल नरहेको उनको भनाइ छ ।
अमेरिकी सेना पूर्ण रूपमा फर्किए पनि ६५० देखि १ हजार अधिकारी भने अमेरिकी दूतावास, काबुल विमानस्थल र अन्य सरकारी पूर्वाधारहरूको रक्षार्थ अफगानिस्तानमै बस्ने बताइएको छ ।
यसै साताको सुरुवातमा आगामी सेप्टेम्बर महिनाबाट अफगानिस्तानबाट बाहिरिन उत्तर एटलाान्टिक सन्धि संगठन, नेटोले तोकेको समय सीमा पश्चात त्यहाँ बस्ने कुनै पनि विदेशी सैन्य फौजलाई कब्जा गर्नेहरूका रूपमा लिइने खतरा रहेको तालिबानले बताएको थियो ।
