२०८२ भदौ १४, शनिवार
२०८२ भदौ १४, शनिवार
काठमाडौं– राष्ट्रिय प्रजातन्त्र पार्टी (राप्रपा)ले सरकारसँग उच्चस्तरीय कूटनीतिक पहलमार्फत भारत र चीनबीच भएको पछिल्लो सम्झौता खारेज गर्न माग गरेको छ ।
राप्रपाले दुवै छिमेकी मुलुकलाई कुनै पनि प्रकारको अतिक्रमण वा उल्लंघन सह्य नहुने स्पष्ट सन्देश दिन पनि सरकारसँग आग्रह गरेको छ ।
‘राप्रपा नेपालको भूस्वाधीनता र राष्ट्रिय स्वाभिमानको पक्षमा दृढतापूर्वक उभिएको छ । यस विषयमा नेपाल सरकारले तत्काल भारत र चीनसँग उच्चस्तरीय कूटनीतिक पहल गरी सहमति खारेज गर्न माग गर्दछ ,
‘कुनै पनि प्रकारको अतिक्रमण वा उल्लंघन सह्य नहुने स्पष्ट सन्देश दिन सरकारसँग आग्रह गर्दछ ।’’ प्रतिनिधिसभा बैठकमा सांसद अनिशा नेपालीले भनिन्,
उनले भारत र चीनबीच हालै भएको सहमतिअनुसार लिपुलेक हुँदै व्यापारमार्ग खोल्ने निर्णयबारे पार्टीका तर्फबाट गम्भीर आपत्ति जनाइन् ।
‘नेपालको सार्वभौमिकता, भौगोलिक अखण्डता र राष्ट्रिय हितमा अप्रत्यक्ष असर पार्ने यस्ता कुनै पनि निर्णयमा नेपाल सरकारलाई पूर्ण रूपमा उपेक्षा गर्दै एकतर्फी रूपमा लिइएको कदम हाम्रो देशको सम्मान र स्वाधीनतामाथि गम्भीर प्रहार हो,’ नेपालीले भनिन् ।
लिपुलेक, लिम्पयाधुरा र कालापानी नेपालका अविभाज्य अंग हुन् भन्ने ऐतिहासिक प्रमाण नक्सा र सन्धि–सम्झौताले प्रष्ट देखाएको उनले जिकिर गरिन् ।
‘यसरी नेपालसँग छलफल नगरी दुई देशबीच व्यापारिक मार्ग खोल्ने सहमति गर्नु नेपालप्रति असम्मानजनक मात्र नभई अन्तर्राष्ट्रिय कानुन र कूटनीतिक मर्यादा विपरीतको कार्य हो,’ राप्रपा सांसद नेपालीले भनिन् ।
