काठमाडाैँ- सर्वोच्च अदालतले एकीकृत समाजवादीका अध्यक्ष माधवकुमार नेपालसहित १४ सांसदको वैधानिकतासम्बन्धी मुद्दामा एकैपटक चैत २० गते अन्तिम सुनुवाइ गर्ने भएको छ । न्यायाधीशद्वय ईश्वर खतिवडा र कुमार रेग्मीको संयुक्त इजलासले सो मुद्दाको लिखित जवाफ आइसकेको भन्दै अन्तिम सुनुवाइका लागि आदेश दिएको हो । 

सर्वाेच्च स्राेतकाअनुसार अन्तिम आदेशकाे माग भएकाेले मुद्दालाई एकैपटक अन्तिम सुनुवाइ हुनेगरी पूर्ण इजलासमा पठाइएकाे हाे । ‘अन्तरिम आदेशको माग भएपछि मुद्दाको सबै अंग पुगेकाले अन्तिम फैसला हुने गरी सर्वोच्चले आदेश जारी गरेको छ,’ सर्वाेच्च स्राेतले भन्याे, ‘त्यही दिन फैसला पनि हुनसक्छ । प्रक्रिया सकिन सक्छ, सकियाे भने त फैसला भइहाल्छ नि ।’

अदालतले नेपालसहित १४ सांसदमाथि पार्टीले गरेको कारबाही सभामुख अग्निप्रसाद सापकोटाले कार्यान्वयन नगरेको, पार्टी विभाजनका लागि झलनाथ खनालसहितका नेताहरूले गरेको सनाखतलाई मान्यता नदिन र लुम्बिनीका सांसदहरू विमला खत्री वली र अजय शाहीमाथि गरेको कारबाहीअनुसार सूचना टाँस गरिनुपर्नेलगायतका विषयको मुद्दा एकै ठाउँमा हेर्दैछ ।

नेपालसहिका १४ सांसदमाथि पार्टीले गरेको कारबाही कार्यान्वयन नभएको भन्दै एमालेले विगत ६ महिनादेखि प्रतिनिधि सभा बैठकलाई अवरुद्ध पार्दै आएको छ ।