२०८१ मङ्सिर २८, शुक्रबार
२०८१ मङ्सिर २८, शुक्रबार
काठमाडौँ- नेपालमा छायाङ्कन भएको बलिउड फिल्म ‘उचाइ’को रेड कार्पेट प्रिमियर बुधबार बेलुका मुम्बईमा सम्पन्न भएको छ ।
विशेष शोमा बलिउड स्टारहरू उपस्थित रहे । अनुपम खेरले फिल्मको विशेष सो राखे, जसमा फिल्मका कलाकारसहित सलमान खान, अक्षय कुमार, कङ्गना रनौत, जया बच्चन, भाग्य श्री, टाइगर श्राफ लगायत सहभागी रहे ।
शोमा जया बच्चनले सामुन्ने उभिएकी अभिनेत्री कङ्गनालाई बेवास्ता गरेर अघि बढेको कुराले चर्चा पाएको छ । कङ्गनाले नमस्कार गर्दा पनि जयाले इग्नोर गरेकी थिइन् ।
निर्देशक सुरज वर्जत्यको हात समातेर सलमान खान हिँडेको दृश्यले पनि चर्चा पायो । निर्माण कम्पनी राजश्री प्रोडक्सनकै ब्यानरबाट अनुपम खेर र सलमान खानले करिअर स्थापित गरेका हुन् ।
अमिताभ बच्चन, बोमन इरानी, अनुपम खेर, परिणिती चोपडा, डेनी डेनजोङ्पा लगायतको अभिनय रहेको फिल्म उचाइको अधिकांश छायाङ्कन नेपालमा गरिएको हो । नेपालमा समेत यो फिल्म शुक्रबारदेखि प्रदर्शन हुँदैछ ।
सुशान्त कुमार श्रेष्ठ लगायत केही नेपाली फिल्म निर्माता तथा कलाकारले उचाइलाई नेपाली फिल्म सरह मानेर कर छुट दिन माग गरेका छन् ।
अधिकांश छायाङ्कन नेपालमा भएको, नेपाली प्राविधिक र कलाकार संलग्न रहेको, नेपाली भाषा पनि समेटिएको र डेनीजस्ता नेपाली भाषी पनि संलग्न भएकाले उचाइलाई सहुलियत दिनुपर्ने माग उनले राखेका छन् ।
झण्डै एक महिनासम्म नेपालमा रहेर छायाङ्कन गरिएको फिल्मले नेपालको पर्यटन प्रवर्द्धनमा फाइदा पुग्ने आशा लिइएको छ ।
