इलाम- एमाले अध्यक्ष केपी शर्मा ओलीले एकीकृत समाजवादीका सम्मानित नेता झथनाल खनालप्रति कटाक्ष गरेका छन् । ‘एमालेको भोटबाट, एमालेका कार्यकर्ताको मेहनतबाट चुनाव जितेका झलनाथ खनालहरू आज कांग्रेसको झम्के पुच्छर भएका छन् । कांग्रेसको जिउमा झिँगा बस्नासाथ झम्के पुच्छर भएर हल्लिने भएका छन् । यस्तालाई विगतमा टिकट दिनु मेरो भूल भयो,’ ओलीले भनेका छन् । 

उनले एमालेका कार्यकर्ता र जनताले जिताएका व्यक्ति नै पार्टी सिध्याउन अग्रसर भएको बताए । उनले भने, ‘यस्ताहरूलाई विगतमा टिकट दिनु मेराे गल्ती भयाे ।’ झलनाथको गृहजिल्ला इलामको माइ नगरपालिकामा आयोजित चुनावी कार्यक्रमलाई सम्बोधन गर्दै ओलीले यस्ताे बताएका हुन् । उनले थपेका छन्, ‘कांग्रेसका पछि लागेकाहरूबाट सचेत बस्नुस् ।’