काठमाडौं - जापानी मोटर उत्पादक कम्पनी होन्डाले सीएल सिरिजको सबैभन्दा सानो मोडल सार्वजनिक गरेको छ । कम्पनीले इटालीको मिलानमा नोभेम्बर १० देखि १३ सम्म आयोजना भएको इआइसीएमए २०२३ मा सीएल ५०० सार्वजनिक गरेको थियो । अहिले त्यसैको सानो संस्करण सीएल ३०० देखाएको हो ।
होन्डाले चिनियाँ बजारलाई मध्येनजर गर्दै सीएल मोडल बजारमा ल्याउन लागेको हो । यसको उत्पादन पनि चीनमा रहेको प्लान्टमा नै हुनेछ । यद्यपि, होन्डाले यसको ट्रेडमार्क थाइल्याण्ड, न्युजिल्याण्ड, अष्ट्रेलिया लगायतका देशमा पनि दर्ता गरिसकेको छ ।
स्क्र्याम्बलर डिजाइनमा तयार भएको सीएल ३०० मोडल यूरोप र अन्य एशियाली देशहरुमा पनि विक्री वितरण हुनेछ । होन्डाले सीएल ३०० मोडलमा २८६ सीसी क्षमताको इन्जिन दिएको छ । उक्त इन्जिनले अधिकतम २५.७ पीएस पावर प्रदान गर्छ । यसमा ६ स्पीड गियरबक्स रहने छ ।
अगाडि टेलिस्कोपीक फर्क र पछाडि मोनोशक सस्पेन्स प्रयोग गरिएको सीएल ३०० मा अगाडि १९ र पछाडि १७ इन्चको ह्वील दिइएको छ । राउन्ड हेडल्याम्प, राउन्ड लुकिङ ग्लास, एलइडी लाइट, गोलो आकारको डिजिटल डिस्प्ले, माथि सिटसँगै दिइएको एग्जस्ट नयाँ मोटरसाइकलको मुख्य विशेषता हो ।
होन्डाले नेपालमा १०० सीसीदेखि ६५० सीसीसम्मका मोटरसाइकल विक्री गर्दै आएको छ ।