२०८२ जेठ २६, सोमबार
२०८२ जेठ २६, सोमबार
काठमाडौं - नेपाल कम्युनिष्ट पार्टी (एमाले)को लुम्बिनी प्रदेश संसदीय दलको बैठकले संसदीय दलका नेता शंकर पोखरेलको नेतृत्वमै सरकार बनाउने निर्णय गरेको छ।
संसदमा अविश्वासको प्रस्ताव दर्ता भएपछि ससदको विशेष अधिवेशन सुरु हुनुअघि नै राजीनामा दिएका पोखरेललाई नै मुख्यमन्त्री बनाउने गरि दलको बैठकले निर्णय गरेको हो।
आइतबार बिहान बुटवलस्थित एक होटलमा बसेको संसदीय दलको बैठकले आइतबार नै मुख्यमन्त्रीबाट राजीनामा दिएका पोखरेलको नेतृत्वमा नयाँ सरकार बनाउने निर्णय भएको एमाले प्रमुख सचेतक भूमिश्वर ढकालले जानकारी दिए।
दलको निर्णअनुसार एमालेले संविधानको धारा १६८ (१) अन्तर्गत एकल बहुमतको दाबीसहित मुख्यमन्त्रीमा पोखरेललाई नियुक्त गर्न अनुरोध गर्दै प्रदेश प्रमुखलाई पत्र बुझाउँदैछ।
संविधानको धारा १६८ को उपधारा (१) बमोजिम प्रदेश प्रमुखले प्रदेश सभामा बहुमत प्राप्त संसदीय दलको नेतालाई मुख्यमन्त्री नियुक्ति गर्ने र निजको अध्यक्षतामा मन्त्रिपरिषद् गठन गर्नसक्ने व्यवस्था छ।
मुख्यमन्त्री पोखरेलको यसअघिको सरकार संविधानको धारा १६८ (२) अनुसारको संयुक्त सरकार थियो।
संसदीय दलको बैठकमा एमालेको माधवकुमार नेपाल समूहका दुई जना सांसदहरू पनि सहभागी भएका थिए।
आइतबार बिहान लुम्बिनी प्रदेशका मुख्यमन्त्री शंकर पोखरेलले राजीनामा दिएलगत्तै बसेको दलको बैठकबाट निर्णय गराएका पोखरेल आजै मुख्यमन्त्रीको शपथ लिने तयारीमा छन् ।
लुम्बिनी प्रदेशसभामा ८७ जना सांसद रहेकोमा पछिल्लो समय जसपाका चार र माओवादी केन्द्रका दुई जना सांसद निलम्बित भएपछि अहिले प्रदेशसभा ८१ सदस्यीय छ।
सत्तारूढ एमालेसँग ४१ सांसद छन्। संविधाननको धारा १६८ (१) अनुसार बहुमतको सरकार बनाउन पुग्ने ४१ सांसद आफ्नो दलका भएपछि पोखरेलले अविश्वासको प्रस्ताव पेश हुने दिन नै चलाखीपूर्वक राजीनामा दिएका हुन्।
