काठमाडौँ -  नेपालको दिगो विकास र समृद्धिका लागि प्रविधिको प्रयोगलाई कसरी अगाडि बढाउने भन्नेबारे साझा दृष्टिकोण बनाउने उद्देश्यले काठमाडौंमा एक महत्त्वपूर्ण कार्यशाला सम्पन्न भएको छ। शनिबार आयोजित उक्त कार्यक्रममा सरकारी निकाय, निजी क्षेत्र, उद्यमी, विज्ञ तथा विकास साझेदारका प्रतिनिधिहरूको उपस्थिति थियो।

कार्यक्रमलाई सम्बोधन गर्दै उद्योग, वाणिज्य तथा आपूर्तिमन्त्री दामोदर भण्डारीले विश्वभर प्रविधिले अर्थतन्त्र र समाजलाई तीव्र गतिमा परिवर्तन गरिरहेको बताउनुभयो। उहाँले भन्नुभयो, "नेपालका लागि डिजिटल क्रान्ति अँगाल्नु अब विकल्प होइन, आवश्यकता बनिसकेको छ।" मन्त्री भण्डारीले प्रविधिको सही प्रयोगबाट सेवा प्रवाहमा सुधार, रोजगारी सिर्जना र अन्तर्राष्ट्रिय प्रतिस्पर्धामा नेपालको क्षमता बढ्ने विश्वास व्यक्त गर्नुभयो।

मन्त्री भण्डारीले नेपालमा इन्टरनेटको पहुँच विस्तार भइरहेको र सूचना प्रविधिमा प्रतिभाशाली युवाहरू बढिरहेको भए पनि थुप्रै चुनौतीहरू रहेको स्वीकार गर्नुभयो। उहाँका अनुसार, पर्याप्त पूर्वाधारको कमी, सबैमा डिजिटल साक्षरताको अभाव, स्टार्टअपमैत्री नीतिको खाँचो र वित्तीय पहुँचमा कठिनाइ जस्ता समस्याहरू अझै छन्।

सरकारले ल्याएको 'डिजिटल नेपाल फ्रेमवर्क', 'राष्ट्रिय स्टार्टअप उद्यम नीति २०८१' जस्ता प्रयासहरू सकारात्मक भए पनि सीप विकासको स्पष्ट खाकाको अभाव, संस्थागत कमजोरी र शिक्षा तथा नवप्रवर्तनमा छरिएको लगानीजस्ता अवरोधलाई तत्काल सम्बोधन गर्नुपर्नेमा उहाँले जोड दिनुभयो। मन्त्री भण्डारीले नयाँ प्रविधिको सदुपयोग गर्दै युवाहरूलाई नेपालमै उज्ज्वल भविष्य खोज्न आग्रह गर्नुभयो।

कार्यशालामा एसियाली विकास बैंक (ADB) को सहयोगमा गरिएको 'टेक एन्ड टेक-इनेबल्ड स्टार्टअप' सम्बन्धी अध्ययनका निष्कर्षमाथि पनि छलफल भएको थियो। सहभागीहरूले पूर्वाधार विकास, नीतिगत सुधार, सीप विकास, वित्तीय पहुँच, र डिजिटल समावेशीकरण जस्ता क्षेत्रमा ठोस तथा कार्यान्वयन गर्न सकिने योजना बनाउन सुझाव दिएका छन्।