काठमाडौं - राष्ट्रिय स्वतन्त्र पार्टी (रास्वपा) का सभापति रवि लामिछानेकी पत्नी निकिता लामिछानेले गृहमन्त्री रमेश लेखकमाथि न्यायिक प्रक्रियामा हस्तक्षेप गरी आफ्ना पतिलाई फसाउन खोजेको गम्भीर आरोप लगाएकी छन्। सामाजिक सञ्जाल फेसबुकमा एक लामो पोस्ट लेख्दै उनले गृहमन्त्री लेखककै निर्देशनमा अदालतको आदेश रोकिएको, न्यायाधीश तर्साउन उजुरी ड्राफ्ट गरिएको र आफूमाथि समेत निगरानी गरिएको दाबी गरेकी छन्।

लामिछानेले अदालतमा मुद्दाको पेसी चढेको दिन नै गृहमन्त्रीको निर्देशनमा न्यायिक परिषद्मा न्यायाधीशविरुद्ध उजुरी पर्ने गरेको र त्यसको ड्राफ्ट गृहमन्त्रीकै कार्यकक्षमा बन्ने गरेको दाबी गरेकी छन्। "उजुरीको ड्राफ्ट आफ्नै कोठामा तयार गरेर त्यस्तो समाचारको लिङ्क आफ्नो सचिवालयलाई सम्बन्धित सबैका मोबाइल मोबाइलमा पठाउन आदेश दिँदै न्यायाधीश तर्साउन नाङ्गिएर लाग्नुहुन्छ किन?" उनले गृहमन्त्रीलाई प्रश्न गरेकी छन्।

उनले अदालतको आदेशविपरीत श्रीमानको अड्डासार रोकिएको, रुपन्देही कारागारमा भेट्न जाँदा आफूलाई सरकारी संयन्त्रले पिछा गर्ने गरेको र बहस सकिएको घण्टौँपछि रात परेपछि मात्रै विपक्षमा फैसला आउने गरेको जस्ता अस्वाभाविक गतिविधि भइरहेको बताएकी छन्।

न्यायपालिकाको स्वतन्त्रतामाथि खुलेआम प्रहार भइरहेको भन्दै उनले प्रधानन्यायाधीश विश्वम्भरप्रसाद श्रेष्ठलाई समेत प्रश्न गरेकी छन्। "सम्माननीय प्रधान न्यायाधीश ज्यू, अब म जिल्ला अदालतको आदेश विरुद्ध उच्च अदालतमा अपिल गर्न जाउँ कि नजाउँ?" उनले लेखेकी छन्।

निकिताले जिल्ला अदालतको आदेशविरुद्ध उच्च अदालत बुटवल जाने र न्याय सम्पादनमा दबाब सिर्जना गरिएको भन्दै न्याय परिषद्मा समेत उजुरी दिने बताएकी छन्। साथै, उनले यो अन्यायविरुद्ध अन्तर्राष्ट्रिय अदालत जानका लागि समेत सहयोगको अपिल गरेकी छन्।