पोखरा, वर्किङ भिसामा अमेरिका पठाइदिन्छु भनी रकम ठगी गरेको आरोपमा कास्की प्रहरीले तीनजनालाई पक्राउ गरेको छ ।

कपिलवस्तुको वाणगंगा घर भई पोखरा- १८ भकुण्डे बस्ने २४ वर्षका विनोद भुषाल, पोखरा २ मिरुवाका ३१ वर्षीय पुकार गुरुङ र पोखरा १२ रानीपौवाका ३० वर्षीय प्रकाश गुरुङ पक्राउ परेका हुन् । उनीहरूविरुद्ध ठगी मुद्दामा कास्की जिल्ला अदालतबाट दिन १० म्याद थपेर अनुसन्धान थालिएको कास्की प्रहरीले जनाएको छ ।

उनीहरुले दुई वर्षदेखि ठगी गरेको प्रारम्भिक अनुसन्धानमा खुलेको छ । ७४ लाख ९ हजार ५ सय रुपैयाँ विभिन्न समयमा ती व्यक्तिहरूको खातामा जम्मा गरेको जाहेरी प्रहरीमा परेको थियो । जाहेरीको आधारमा केन्द्रीय अनुसन्धान ब्युरो र जिल्ला प्रहरी कार्यालयबाट खटिएको टोलीले तीनैजनालाई पक्राउ गरेको कास्की प्रहरी प्रवक्ता डीएसपी सुवास हमालले जानकारी दिए ।

पोखरामा पछिल्लो समय विदेश पठाइदिने बहानामा ठगी गर्नेहरु बढेका छन् ।