काठमाडौं- कबड्डी–४ की अभिनेत्री मिरूना मगर र मुगुका फुर्वा तामाङबीचको विवाद टुंगिएको छ।

आइतबार कबड्डी–४ फिल्म प्रमोशनको लागि गएको बेला आफूमाथि अभद्र व्यवहार गरेको भन्दै अभिनेत्री मगरले तामाङविरुद्ध उजुरी गरेकी थिइन्। त्यसपछि उनी पक्राउ परेका थिए।

तामाङलाई फसाउन खोजिएको भन्दै मंगलबार विरोध प्रदर्शन भएको थियो। तामाङ मंगलबार दिउँसै ३ हजार धरौटीमा रिहा भएका थिए।

त्यसपछि मंगलबार साँझ दुबै पक्षबीच मिलापत्र भएको छ। मंगलबार साँझ सार्वजनिक गरिएको मिलापत्रमा आरोपित फुर्वा तामाङले गल्ती स्वीकार गर्दै अभिनेत्रीसमक्ष माफी मागेको र अभिनेत्री मगरले उनलाई भाइ सम्झेर माफी दिएको उल्लेख छ।

यस्तै अभिनेत्री मगरले पनि कुनै जाति, धर्म, सम्प्रदायप्रति असर पुग्ने आसयले कुनै कार्य नगरेको बताएकी छन्। मिलापत्रमा भनिएको छ, ‘उक्त परिस्थितिमा आकस्मिक प्रतिक्रिया जनाउने क्रममा घटित हुन गएको घटनाबाट सिंगो बौद्ध धर्मावलम्बी, भिक्षु लामा समुदाय तथा सम्प्रदाय प्रति पर्न गएको असरप्रति क्षमा याचना गरेकी छिन्।’