काठमाडाैँ । एकीकृत समाजवादीका अध्यक्ष माधवकुमार नेपालले आफूहरूले एमसीसी सम्झौता पारित गर्न साथ नदिएको भए पार्टी नै समाप्त हुने खतरा बढेकाे बताएका छन् । बुधबारबाट शुरू भएकाे केन्द्रीय समिति बैठकमा पेश गरेकाे राजनीतिक प्रतिवेदनमा अध्यक्ष नेपालले यस्ताे बताएका हुन् । 

एमसीसी पारित गर्न साथ नदिएकाे भए नेपाली कांग्रेस र एमाले मिलेर एमसीसी सम्झौता पारित गर्ने र आफ्नो पार्टीको अस्तित्व नै समाप्त पार्ने जोखिम रहेको अध्यक्ष नेपालकाे भनाइ छ । ‘यदि हामीले यसो नगरेको भए नेपाली कांग्रेस र एमाले मिलेर पाँचदलीय गठबधनलाई तोड्ने, सभामुखलाई हटाउने र हाम्रो पार्टीका १४ जना सांसदलाई कारबाही गर्ने गरी नेका र एमाले मिलेर एमसीसी कम्प्याक्ट जस्ताको तस्तै अनुमोदन गर्ने थिए,’ अध्यक्ष नेपालले भनेका छन् ।