चर्चित अनलाइन खेल पब्जी खेल्न नदिएको झोकमा भारतमा एक १६ वर्षीय किशोरले गोली हानी आफ्नै आमाको हत्या गरेका छन् । घटना उत्तर प्रदेशको लखनऊमा पर्ने यमुनापुरम कोलोनीमा भएको प्रहरीले जनाएको छ । एडिशनल डीसीपी कासिम आबिदीले समाचारसंस्था पीटीआईलाई भनेः “लखनऊको पीजीआई प्रहरी थानाअन्तर्गत पर्ने यमुनापुरम कोलोनीमा एक महिला दुई बच्चासहित बस्थिन् । उनका श्रीमान् सरकारी जागिरको सिलसिलामा हाल पश्चिम बङ्गालमा छन् ।”

“सोह्र वर्षका यी किशोर पब्जीको कुलतमा फसेका रहेछन् । किशोरका अनुसार उनकी आमाले पब्जी खेल्नबाट रोक्ने गर्थिन् । आइतवार सखारै उनले आफ्नो बुवाको लाइसेन्स प्राप्त पिस्तोलले आमाको हत्या गरे ।” हत्यामा प्रयोग गरिएको पिस्तोल प्रहरीले बरामद गरेको छ । क्षतविक्षत अवस्थामा महिलाको शव मङ्गलवार फेला पारेको प्रहरीले जनाएको छ । प्रहरीका अनुसार पोस्टमोर्टमका लागि शव अस्पताल पठाइएको छ भने किशोरलाई हिरासतमा लिइएको छ ।

प्रहरीका अनुसार सुरुमा ती किशोरले घटनाबारे झूटो कथा बुन्ने प्रयास गरेका थिए ।
हत्या आफूले नभई उनीहरूको घरमा आइरहने बिजुलीको काम गर्ने व्यक्तिको गरेको बताएका थिए । तर ती व्यक्तिसँग सोधपुछ गर्दा किशोरले झूटो बोलेको थाहा भयो ।

भारतले चीनमा विकसित ११८ वटा मोबाइल एपमाथि दुई वर्षअघि प्रतिबन्ध लगाएकोमा पब्जी पनि एउटा थियो । तर त्यो प्रतिबन्ध मोबाइल भर्सन अर्थात् मोबाइलमा चलाउन मिल्ने मात्र प्रतिबन्धित रहेको पाइयो । रिपोर्टहरूका अनुसार डेस्कटप भर्सन चाहिँ उपलब्ध थियो । मोबाइलमा पनि पब्जी भर्चुअल प्राइभेट नेटवर्क अर्थात् भीपीएनको प्रयोग गरी खेल्न सकिन्छ ।