२०८२ भदौ १४, शनिवार
२०८२ भदौ १४, शनिवार
काठमाडौं। गत असार २८ गते छाउगोठमा सुतेका बेला सर्पले टोक्दा एक महिलाको ज्यान गएको छ । कञ्चनपुरको कृष्णपुर नगरपालिका–१ निगालीकी २८ वर्षीय कमला दमाई (आउजी) को महिनावारी भएर छाउगोठमा सुतेका बेला सर्पले टोकेर मृत्यु भएको हो ।
उनलाई बायाँ गालामा सर्पले डसेपछी उपचारका लागि सेती प्रादेशिक अस्पताल धनगढी पुर्याइएको थियो । अस्पतालमा उपचारका क्रममा कमलाको मृत्यु भएको थियो ।
तीन स–साना बालबालिकाकी आमा कमलाका श्रीमान् रोजगारीका लागि भारतमा रहेका थिए । कमलाको बस्नका लागि पक्की घर भए पनि महिनावारी भएपछि सुत्नका लागि घरको आँगनमै बनाइएको गोठमा सुत्न गएकी थिइन् ।
उनी दुई महिना अघि मात्र भारतबाट घर आएकी थिइन् । कमलासहित २०७३ साल यता छाउगोठमा ज्यान गुमाउनेको संख्या आठ पुगेको छ । सुदूरपश्चिम प्रदेश प्रहरी कार्यालय, धनगढीले दिएको जानकारी अनुसार यो अवधिमा अछाममा सबैभन्दा बढी चार जनाले छाउगोठमा ज्यान गुमाएका छन् ।
प्रहरीका अनुसार २०७३ साल कात्तिक ८ गते अछामको साबिक तिमिन्सैन गाउँ विकास समिति–७ कि ४५ वर्षीया डम्मरा उपाध्यायको छाउगोठमा निसास्सिएर मृत्यु भएको थियो । सोही दिन साबिक गाजरा गाविस–६ कि १५ वर्षीया किशोरी रोशनी तिरुवाको पनि छाउगोठमै निसास्सिएर मृत्यु भएको थियो ।
२०७४ साल पुष २७ गते अछामकै तुर्माखाँद गाउँपालिका–३ कि गौरी वयक बुढाको छाउगोठमा निसास्सिएर मृत्यु भयो । २०७६ साल मंसिर १५ गते साँफेवगर नगरपालिका–३ कि पार्वती बुढा रावलको छाउगोठमा सर्पले टोकेर मृत्यु भएको थियो ।
बाजुरामा एकै दिन तीन जनाको छाउगोठमा ज्यान गयो । जिल्लाको बुढीनन्दा नगरपालिका–९ कि ३५ वर्षीया अम्वा बोहरा महिनावारी हुँदा २०७५ साल पुष ३ गते छाउगोठमा सुतेकी थिइन् । उनीसँगै उनका दुई छोराहरु १२ वर्षीय सुरेश बोहरा र नौ वर्षीय रमित बोहरा पनि छाउगोठमै सुतेका थिए ।
राती सुतेका बेला छाउगोठमा आगलागी हुँदा तिनै आमाछोराले ज्यान गुमाउनु परेको थियो । प्रदेश प्रहरी कार्यालयले दिएको जानकारी अनुसार यो अवधिमा अछाममा दुई महिलामाथी बलात्कार भएको छ । २०७९ साल मंसिर ६ गते कमलबजार नगरपालिकाकी एक १३ वर्षीया बालिका छाउगोठमा सुतिरहेका बेला बलात्कृत भएकी थिइन् ।
