×
समाचार समाज पत्रपत्रिका मनोरञ्जन विश्व स्वास्थ्य अर्थ/वाणिज्य शिक्षा सम्पादकीय संस्कृति/संस्कार प्रदेश खेलकुद सूचना/प्रविधि पर्यटन इन्द्रेणी–विशेष

समाचार

प्रधानमन्त्री कप क्रिकेट : मधेस, लुम्बिनी र पुलिसको विजयी सुरुआत

प्रधानमन्त्री कप क्रिकेट : मधेस, लुम्बिनी र पुलिसको विजयी सुरुआत

काठमाडौं - प्रधानमन्त्री कप एकदिवशीय पुरुष राष्ट्रिय क्रिकेट प्रतियोगितामा नेपाल पुलिस क्लब, मधेस प्रदेश र लुम्बिनी प्रदेशले विजयी सुरुआत गरेका छन् । शनिबारदेखि सुरु प्रतियोगितामा पुलिसले वाग्मती प्रदेश, मधेसले कोसी प्रदेश र लुम्बिनीले गण्डकी प्रदेशलाई पराजित गरेका हुन् ।

कीर्तिपुरस्थित त्रिवि खेल मैदानमा पुलिसले वाग्मती प्रदेशलाई ६८ रनले हरायो । जितका निम्ति २८३ रनको विजयी लक्ष्य पछ्याएको वाग्मती ४२.३ ओभरमा २१४ रनमा अलआउट भयो ।

वाग्मतीका आषुतोश घिरैयाले ९२ रनको योगदान गरे पनि टिमलाई जिताउन सकेनन् ।
त्यसअघि, टस जितेर पहिला ब्याटिङ रोजेको पुलिसले निर्धारित ५० ओभरमा ८ विकेट गुमाउँदै २८२ रन बनाएको थियो । पुलिसका राशिद खानले १०६ रनको अविजित शतकीय इनिङ्स खेले ।

यस्तै, मूलपानी क्रिकेट मैदानमा मधेसले कोसीलाई ७ विकेटले पराजित गर्‍यो । कोसीले दिएको १२८ रनको लक्ष्य मधेसले २० ओभर १ बलमा तीन विकेट गुमाउँदै पूरा गर्‍यो । मधेसका अनिलकुमार साहले ८८ रनको अर्धशतकीय पारी खेले ।

त्यसअघि, टस हारेर पहिला ब्याटिङ गरेको कोसीले ४१ ओभरमा सबै विकेट गुमाउँदै १२७ रन बनाएको थियो ।

प्रतियोगिताअन्तर्गत शनिबारै भैरहवास्थित सिद्धार्थ रंगशालामा भएको खेलमा लुम्बिनीले गण्डकीलाई ४ विकेटले हरायो । ११२ रनको सामान्य विजयी लक्ष्य लुम्बिनीले २८.२ ओभरमा ६ विकेट गुमाउँदै पूरा गर्‍यो । लुम्बिनीको जितमा निर्मल गुरुङले ४७ रन बनाए ।

त्यसअघि, टस हारेर पहिला ब्याटिङको निम्तो पाएको गण्डकी ३४.४ ओभरमा १११ रनमा अलआउट भएको थियो ।

पहिलोपटक ‘राउन्ड रोबिन लिग फर्म्याट’मा आयोजित प्रतियोगितामा सात प्रदेश र तीन विभागीय टिम सहभागी छन् । हिमालयन टेली भ्वाइस
 

प्रतिकृया दिनुहोस्