काठमाडौं । काठमाडौंको सुन्धारास्थित सिभिल मलमा रहेको एक खेलौना पसलबाट प्रहरीले सक्कली जस्तै देखिने ६ थान नक्कली हतियार बरामद गरेको छ। शुक्रबार दिउँसो गरिएको खानतलासीको क्रममा अवरोध पुर्‍याएको आरोपमा प्रहरीले एक जनालाई पक्राउ समेत गरेको छ।

प्रहरी वृत्त जनसेवाबाट खटिएको टोलीले विशेष सूचनाको आधारमा सिभिल मलको पाँचौं तलामा रहेको 'द टोय स्टोर' नामक पसलमा छापा मारेको हो। दिउँसो करिब साढे १२ बजे प्रहरी निरीक्षक देवेन्द्रराज जोशीको नेतृत्वमा गएको ५ जनाको टोलीले पसलमा खानतलासी गर्दा उक्त हतियारहरू फेला पारेको थियो।

प्रहरीका अनुसार उक्त पसल धादिङको निलकण्ठ–३ घर भई हाल बसुन्धारा बस्ने सन्तोषी श्रेष्ठले सञ्चालन गर्दै आएकी थिइन्।

खानतलासीका क्रममा प्रहरीलाई अवरोध गर्न खोजेको भन्दै काभ्रेको रोशी गाउँपालिका-३ का ३१ वर्षीय सुरज मगरलाई नियन्त्रणमा लिइएको हो। उनी हाल काठमाडौंको कलंकीमा बस्दै आएका थिए।

पक्राउ परेका मगरविरुद्ध अभद्र व्यवहारको कसुरमा जिल्ला प्रशासन कार्यालय, काठमाडौंबाट तीन दिनको म्याद थप गरी अनुसन्धान भइरहेको प्रहरीले जानकारी दिएको छ।