लन्डन: श्रीलंका क्रिकेट टिमका उपकप्तान कुसल मेन्डिससहित तीन खेलाडीलाई खेल सुरू हुनुअगावै फिर्ता पठाइएको छ।कोरोना मापदण्ड पालन नगरेको भन्दै उनीहरूलाई फिर्ता पठाइएको हो। श्रीलंका र इंगल्यान्डबीच मंगलबार एक दिवसीय म्याच हुँदैछ।

उपकप्तान मेन्डिसका साथै ओपनर धनुष्का गुणातिलका र विकेट किपर निरोशन डिकवेललाई फिर्ता पठाइएको हो।

सामाजिक सञ्जालमा तीनै खेलाडीको तस्बिर सार्वजनिक भएको थियो। उनीहरू डरहमस्थित सिटी सेन्टर पुगेका थिए।

‘यो निर्णय प्रारम्भिक जाँचपछि लिइएको हो । तीनैजना खेलाडी सामाजिक सञ्जालमा पोस्ट गरिएको एक भिडिओमा आफ्नो निर्धारित होटल बाहिर देखिएका थिए,’ श्रीलंका क्रिकेटले भनेको छ । छानबिन पूरा नहुँदासम्म उनीहरू निलम्बित रहने उसको भनाइ छ ।

कोरोना संक्रमण रोकथाम र नियन्त्रणका लागि इंग्ल्यान्डमा मापदण्ड निर्धारण गरिएको छ ।