२०८१ फाल्गुण २९, बिहिबार
२०८१ फाल्गुण २९, बिहिबार
नयाँ आर्थिक वर्षको सुरुवातमा धितोपत्र बजारमा शेयर कारोबार मापक नेप्से परिसूचक र कारोबार रकम दुवैमा सकारात्मक सङ्केत देखिएको छ ।
बजार पूँजीकरणमा समेत उत्साहजनक अवस्था सिर्जना भएको छ । नयाँ सरकार गठन भएपछि लगानीकर्तामा विश्वाससमेत बढेको पाइएको छ । नेप्से परिसूचकसमेत तीन हजार विन्दुमा पुगेको छ । यो हालसम्मकै शीर्ष स्थान हो ।
बजारमा झण्डै एक महिना जस्तो ‘करेक्शन’ देखियो । लगानीकर्ताले बैंक तथा वित्तीय संस्थाको ब्याज तिर्नुपर्ने तथा अन्य आर्थिक कारोबार मिलाउनु पर्ने भएकाले पनि असारको अन्तिम दुई साता बजारमा करेक्शन देखिएको हो ।
आर्थिक वर्षको पहिलो कारोबार दिन साउन ३ गते नेप्सेमा हरियाली छाएको छ । गत आर्थिक वर्षमा ऐतिहासिक रेकर्ड कायम गरेको शेयर बजारमा वर्षको पहिलो कारोबार दिनमा पनि सोही उत्साह देखिएको छ ।
यस साता चार दिनमात्रै शेयर बजारमा कारोबार भयो । बुधबार सार्वजनिक बिदा परेकाले पनि कूल चार दिनमात्रै कारोबार भएको नेपाल स्टक एक्सचेञ्जले जनाएको छ ।
यही साउन ३ गते पुनः स्थापित संसद्मा प्रधानमन्त्री शेरबहादुर देउवाले विश्वासको मत लिँदै थिए । सो दिन शेयर बजारले पछिल्लो राजनीतिक घटनाक्रमलाई स्वागत गर्यो ।
यस साता कूल २२२ कम्पनीको ४२ अर्ब ५१ करोड ३५ लाख ९६ हजार ९८४ रुपैयाँ बराबरको कारोबार भयो । नेप्सेका अनुसार यस साता कूल १५ करोड ४० लाख छ हजार ७०२ कित्ता शेयर कारोबार भयो ।
साताको पहिलो दिन आइतबार नेप्से परिसूचक ९७ दशमलव २१ अङ्कले बढेर २९८० दशमलव ६१ विन्दुमा पुगेको थियो । सो दिन दुई करोड ८८ लाख ६३ हजार ९३ कित्ता शेयर ११ अर्ब ६८ करोड ८१ लाख २६ हजार ४९२ रुपैयाँमा कारोबार भयो । त्यस दिन १९४ वटा कम्पनीको शेयर मूल्य बढेको थियो भने २२ वटा कम्पनीको शेयर मूल्य ओरालो लाग्दा पाँचवटा कम्पनीको शेयर मूल्य स्थिर रहेको थियो ।
त्यस दिन समृद्धि फाइनान्स, सिन्धु विकास बैंक, ङादी ग्रुप अफ पावर, हिमालयन पावर पार्टनर र सिङ्गटी हाइड्रो इनर्जी कम्पनीको शेयर मूल्यमा सकारात्मक सर्किट लागेको थियो ।
साताको दोस्रो दिन सोमबार नेप्से परिसूचक दोहोरो अङ्कले बढेको थियो । नेप्से परिसूचक १३ दशमलव ९७ अङ्कले बढेर दुई हजार ९९४ दशमलव ५८ मा पुगेको थियो ।
ठूला कम्पनीको शेयर कारोबार मापक सेन्सेटिभ परिसूचक ० दशमलव ०२ विन्दुले घटेर ५६० दशमलव ९४ मा ओर्लियो । कूल २१९ कम्पनीको तीन करोड ७५ लाख ७१ हजार ३५४ कित्ता शेयर ११ अर्ब ८१ करोड ३७ लाख ५४ हजार ६०७ रुपैयाँ मूल्यमा खरीद बिक्री भए । कारोबार भएका १३ उपसमूहमध्ये पाँच उपसमूहको शेयर ओरालो लाग्दा आठ उपसमूहको शेयर भने उकालो लागेको थियो ।
सोमबारको कारोबारपछि बजार पूँजीकरण ४१ खर्ब ६५ अर्ब ६१ करोड ४७ हजार ५९ रुपैयाँ बराबर पुगेको छ । कारोबारका आधारमा एनआइसी एशिया बैंक शीर्ष स्थानमा रहेको थियो ।
कारोबारका आधारमा सिनर्जी पावरको शेयर १० प्रतिशतले वृद्धि भई सकारात्मक सर्किट लागेको थियो भने विशाल बजार कम्पनी ९ दशमलव २०, नेपाल इन्सुरेन्स ७ दशमलव ५७, नागरिक लगानी कोष ६ दशमलव ४० र हिमालयन ऊर्जा विकास कम्पनीको लगानीकर्ताले ५ दशमलव ९८ प्रतिशतले कमाएका थिए ।
त्यस दिन नेपाल इन्भेस्टमेन्ट बैंकको ऋणपत्र ५ दशमलव ८७, सनराइज बैंकको ऋणपत्र ५ दशमलव ०६, गुर्खाज फाइनान्स ३ दशमलव ६०, मञ्जुश्री फाइनान्स ३ दशमलव २० र एचआइडिसिएलका लगानीकर्ताले ३ दशमलव ०२ प्रतिशतले गुमाएका थिए ।
साताको तेस्रो दिन मङ्गलबार धितोपत्र बजारमा शेयर कारोबार मापक नेप्से परिसूचक ओरालो लाग्यो । त्यस दिन नेप्से ९ दशमलव ०१ अङ्कले ओरालो लागेर दुई हजार ९८५ दशमलव ५७ मा ओर्लेको थियो । यस्तै, ठूला कम्पनीको शेयर कारोबार मापन गर्ने सेन्सेटिभ परिसूचक २ दशमलव ८२ अङ्कले ओरालो लागेर ५५८ दशमलव ११ मा ओर्लेको थियो ।
कूल २१९ कम्पनीको तीन करोड १६ लाख आठ हजार १९३ कित्ता शेयर सात अर्ब ८९ करोड ७५ लाख ९४ हजार २६९ रुपैयाँ मूल्यमा खरीद बिक्री भए । मङ्गलबारको कारोबारपछि बजार पूँजीकरण ४१ खर्ब ५३ अर्ब सात करोड ९० लाख ३४ हजार ३०२ रुपैयाँको हाराहारीमा पुगेको थियो ।
त्यस दिन कारोबार भएका कूल १३ उपसमूहमध्ये पाँच उपसमूहको शेयर मूल्य उकालो लाग्दा आठ उपसमूहको शेयर भने ओरालो लाग्यो ।
त्यस दिन कारोबारका आधारमा अरुण काबेली पावर शीर्ष स्थानमा रहेको थियो । सो कम्पनीको ३८ करोड ७८ लाख २० हजार ९६८ रुपैयाँ बराबरको कारोबार भयो । त्यस दिन लक्ष्मी उन्नति कोष १० दशमलव ०४, लक्ष्मी इक्विटी फन्ड १० दशमलव ०१, वरुण हाइड्रोपावर ९ दशमलव ३९, माउन्टेन हाइड्रोपावर ९ दशमलव २८ र ग्लोबल आइएमई समुन्नत स्किम–एकका लगानीकर्ताले ८ दशमलव ९२ प्रतिशतले कमाएका थिए ।
बुधबार सार्वजनिक बिदा भएकाले शेयर कारोबार भएन । शेयर कारोबार हुने साताको अन्तिम दिन बिहीबार कारोबार मापक नेप्से परिसूचक तीन हजार विन्दु पार गर्यो । त्यस दिन नेप्से परिसूचक १८ दशमलव ७५ विन्दुले बढेर तीन हजार ४ दशमलव ३१ मा पुगेको थियो । ठूला कम्पनीको शेयर कारोबार मापन गर्ने सेन्सेटिभ परिसूचक ४ दशमलव ०६ विन्दुले बढेर ५६२ दशमलव २४ मा पुगेको थियो ।
कूल २२२ कम्पनीको पाँच करोड ५९ लाख ६४ हजार ६२ कित्ता शेयर ११ अर्ब ११ करोड ४१ लाख २१ हजार ६१६ रुपैयाँ बराबरको कारोबार भएको थियो । बिहीबारको कारोबारपछि बजार पूँजीकरण ४१ खर्ब ७९ अर्ब १७ करोड ४७ लाख ३१ हजार ६७३ रुपैयाँ बराबर पुगेको छ ।
बिहीबार कारोबार भएका १३ उपसमूहमध्ये आठ उपसमूहको शेयर ओरालो लाग्दा पाँच उपसमूहको शेयर मूल्य भने उकालो लागेको थियो । त्यस दिन कारोबारका आधारमा कृषि विकास बैंक शीर्ष स्थानमा रहेको थियो । सो बैंकको ४६ करोड २७ लाख ६४ हजार ६४० रुपैयाँ बराबरको कारोबार भयो ।
बिहीबार लक्ष्मी उन्नति कोष १० दशमलव ०४, सिइडिबी हाइड्रोपावर १०, ङादी ग्रुप अफ पावर १०, पोखरा फाइनान्स ९ दशमलव ९५ र माउन्टेन हाइड्रोका लगानीकर्ताले ९ दशमलव ९५ प्रतिशतले कमाएका थिए ।
साताभर माउन्टेन हाइड्रो नेपालका लगानीकर्ताले ३० दशमलव ९२ प्रतिशतले कमाएका थिए । यस्तै, लक्ष्मी इक्विटी फन्ड २७ दशमलव ३९, लक्ष्मी उन्नति कोष २४ दशमलव २५, कृषि विकास बैंक २७ दशमलव ७६ र सिइडिबी हाइड्रोपावरका लगानीकर्ताले २२ दशमलव ६२ प्रतिशतले कमाए ।
त्यसैगरी राष्ट्रिय बीमा कम्पनीका संस्थापक शेयरधनीले ५ दशमलव ५५ प्रतिशतले गुमाउँदा गुर्खाज फाइनान्स ५ दशमलव ४४, सारथी नेपाल लघुवित्त ४ दशमलव ६६, एभरेष्ट इन्सुरेन्सको संस्थापक शेयर ४ दशमलव ५९ र मल्टीप्रपोज फाइनान्स कम्पनीका लगानीकर्ताले ४ दशमलव १९ प्रतिशतले गुमाए ।
