देशभर मनसुनी वायुको प्रभाव रहेकाले मंगलबार पनि वर्षा हुने देखिएकाे छ। माैसम पूर्वानुमान महाशाखाका अनुसार हाल देशको दक्षिणी भूभाग नजिक मनसुनी न्युन चापिय रेखा रहेको छ। जसकारण बिहान प्रदेश २,  बागमती, लुम्बिनी र गण्डकीका केही ठाउँमा पानी परेकाे छ। 

दिउँसो देशभर सामान्य बदली रहनेछ। 'देशका धेरै स्थानमा हल्का देखि मध्यम वर्षाको सम्भावना रहेको बाग्मती प्रदेश, गण्डकी प्रदेश र लुम्बिनी प्रदेशका एक वा दुई स्थानमा मेघगर्जन र चट्टयाङसहित भारी वर्षाको सम्भावना छ,' महाशाखाले भनेकाे छ। राति प्रदेश १, २, बाग्मती र  सुदूरपश्चिम प्रदेशका एक वा दुई स्थानमा भारी वर्षाको सम्भावना छ।

बुधबार देशका धेरै स्थानमा हल्कादेखि मध्यम वर्षाको सम्भावना छ। त्यसमा पनि प्रदेश १, बागमती, लुम्बिनी र सुदूरपश्चिम प्रदेशका  एक वा दुई स्थानमा भारी वर्षाको सम्भावना छ।

'पहाडी भूभागमा पहिरो तथा गेग्रान बहावको जोखिम रहेको, नदीनाला तथा खहरे खोलाहरुमा पानीको सतह बढ्न सक्ने तथा यातायात क्षेत्र प्रभावित हुन सक्ने भएकोले आवश्यक सतर्कता अपनाउनु हुन सबैमा अनुरोध छ,' महाशाखाले भनेकाे छ।