डडेल्धुरा- नेपाली कांग्रेस सभापति तथा प्रधानमन्त्री शेरबहादुर देउवाले मतदान गरेका छन्।देउवाले गृह जिल्ला डडेल्धुराको गन्यापधुरा गाउँपालिकाको अशिग्राम मावि रुवाखोलामा रहेको मतदान केन्द्र ‘ख’ बाट मताधिकार प्रयोग गरेको सहायक मतदान अधिकृत दिलीप तामाङले जानकारी दिए।

निर्वाचन कार्यालयका अनुसार गन्यापधुरामा कुल १० हजार ४१४ जना मतदाता छन् ।यसअघि पनि प्रधानमन्त्रीले यही मतदान केन्द्रबाट मताधिकार प्रयोग गरेका थिए।

पाँच वर्षका लागि स्थानीय तहका जनप्रतिनिधि चुन्न मतदान जारी छ। देशैभर बिहान ७ बजेबाट मतदान सुरु भएको निर्वाचन आयोगले जानकारी दिएको छ। मतदान साँझ ५ बजेसम्म जारी हुनेछन्।

मतदानपछि पत्रकारसँग कुरा गर्दै देउवाले स्थानीय तह निर्वाचनले लोकतन्त्र बलियो बनाएको बताए। उनले सिंहदरबारका अधिकार गाउँगाउँमा पुगेको बताए । देउवाले गठबन्धनले कांग्रेस कमजोर नभएको बताए ।