काठमाडौं – मलेसियामा जारी एसिसी मेन्स यु-१६ इस्ट जोन कप क्रिकेटको पहिलो खेलमा नेपालले उत्कृष्ट बलिङ प्रदर्शन गरेको छ। कप्तान विपिन शर्माको सानदार बलिङमा सिंगापुरलाई १३८ रनमा अलआउट गर्दै नेपालले जितका लागि १३९ रनको सामान्य लक्ष्य पाएको छ।

युकेएम ओभलमा टस जितेर पहिले ब्याटिङ रोजेको सिंगापुर ३६.१ ओभरमा अलआउट भएको थियो। सिंगापुरका लागि कप्तान रियन नायकले सर्वाधिक ५३ रन बनाए पनि अन्य ब्याट्सम्यानले उल्लेख्य प्रदर्शन गर्न सकेनन्। उनले ५३ बलमा ९ चौका प्रहार गरे। ओपनर आहान भुधानभामले ३८ रन जोडे।

नेपालको कसिलो बलिङसामु सिंगापुरका ब्याट्सम्यान टिक्न सकेनन्। नेपालका लागि कप्तान विपिन शर्माले घातक बलिङ गर्दै ४ विकेट लिए। त्यस्तै, सचिन भट्टले ३ तथा शुभम खनाल र अभय यादवले एक-एक विकेट हात पारे।

नेपाल प्रतियोगिताको साबिक विजेता हो र हालसम्मका तीनै संस्करणको उपाधि जितेको छ। प्रतियोगितामा सहभागी १० टोलीलाई दुई समूहमा विभाजन गरिएको छ। समूह 'ए' मा नेपालसँगै सिंगापुर, इन्डोनेसिया, भुटान र जापान छन् भने समूह 'बी' मा आयोजक मलेसिया, हङकङ, माल्दिभ्स, थाइल्याण्ड र म्यानमार रहेका छन्।

नेपालले आफ्नो दोस्रो खेल मंगलबार जापानविरुद्ध खेल्नेछ। समूह चरणबाट शीर्ष दुई टोली सेमिफाइनलमा पुग्नेछन् र फाइनल खेल जुलाई ५ (असार २१) मा हुनेछ।