धनगढी - कैलाली जिल्ला कारागारमा रहेका एक कैदीको मृत्यु भएपछि उनको गृहजिल्ला डडेलधुरामा तनाव सिर्जना भएको छ। मृत्युलाई शंकास्पद भन्दै निष्पक्ष छानबिनको मागसहित उद्योग वाणिज्य संघ, डडेलधुराको अगुवाइमा बजार बन्द गरेर आन्दोलन थालिएको हो।

डडेलधुराको भागेश्वर गाउँपालिका–५ का २८ वर्षीय हरिश सिंह पालीको सोमबार धनगढीस्थित सेती प्रादेशिक अस्पतालमा उपचारका क्रममा मृत्यु भएको थियो। बैंकिङ कसुरको सजाय काटिरहेका पाली असार २ गते बिहान बिरामी परेपछि उनलाई अस्पताल लगिएको थियो। कैलालीका प्रहरी नायब उपरीक्षक राजकुमार सिंहका अनुसार उपचारकै क्रममा उनको मृत्यु भएको हो।

पालीको मृत्यु शंकास्पद रहेको भन्दै परिवार र स्थानीयले निष्पक्ष छानबिनको माग गरेका छन्। मंगलबार बिहानैदेखि उद्योग वाणिज्य संघको नेतृत्वमा डडेलधुरा बजार, यातायात र अन्य सेवाहरू पूर्ण रूपमा बन्द गरिएका छन्। आन्दोलनकारीले सत्यतथ्य बाहिर नआएसम्म र दोषीमाथि कारबाही नभएसम्म आन्दोलन जारी राख्ने चेतावनी दिएका छन्।

मृतक पालीको शव हाल सेती प्रादेशिक अस्पतालको शव गृहमा राखिएको र घटनाबारे थप अनुसन्धान भइरहेको प्रहरीले जनाएको छ।