काठमाडौं - आगामी क्रिकेट प्रतियोगिताको तयारीलाई थप बलियो बनाउने क्रममा नेपाली राष्ट्रिय क्रिकेट टोलीले अस्ट्रेलियामा थप पाँच अभ्यास खेल खेल्ने भएको छ । नेपाल क्रिकेट संघ (क्यान) ले बिहीबार एक विज्ञप्ति जारी गर्दै नेपाली टोलीले क्रिकेट एसिटी र साउथ अस्ट्रेलियासँग अभ्यास सिरिज खेल्ने तालिका सार्वजनिक गरेको हो ।

यो अभ्यास सिरिज अगस्ट २६ देखि ३० सम्म चल्नेछ । सिरिज अन्तर्गत नेपालले अगस्ट २६ मा क्रिकेट एसिटीसँग दुईवटा टी-२० खेल्नेछ भने अगस्ट २८ मा साउथ अस्ट्रेलियासँग पनि दुईवटा टी-२० खेल्ने तालिका रहेको छ । क्यानका अनुसार, यी टी-२० खेलहरू दुई सत्रमा हुनेछन्, जसमा पहिलो खेल नेपाली समय अनुसार बिहान ४:४५ बजे र दोस्रो खेल बिहान ९:४५ बजे सुरु हुनेछ । सिरिजको अन्त्यमा नेपालले अगस्ट ३० मा साउथ अस्ट्रेलियासँगै एकदिवसीय खेल खेल्दै आफ्नो अभ्यास भ्रमण टुङ्ग्याउनेछ ।

यो नयाँ अभ्यास सिरिजअघि नेपाली टोलीले अस्ट्रेलियामै आयोजना हुने 'टप एन्ड टी-२० सिरिज'मा पनि सहभागिता जनाउनेछ । यी अभ्यास खेलहरूले खेलाडीलाई अस्ट्रेलियन परिस्थितिमा अभ्यस्त हुन र आफ्नो प्रदर्शनमा सुधार ल्याउन महत्वपूर्ण अवसर प्रदान गर्ने विश्वास लिइएको छ ।